DILI, STLTIMORLESTE.com – Turista internasionál hamutuk nain 18 too iha Dili loron Kinta (19/06) no atraka mai portu Dili iha loron Sesta (19/06) ho Roo PASPALEY PEARL husi Australia, hanesan parte ida atu halo mos promosaun turizmu iha Timor Leste (TL).
Iha vizita nee laos esplora sitiu turistiku deit, maibe fo benefisiu ba portu no Estadu Timor Leste no komunidade liu husi gastu hirak neebe vizitante sosa nesesidade bazika no seluk-seluk.
“Husi sira nia vizita nee benefisiu iha buat rua, ida mak taxa ba portu nee rasik no ida seluk mak ba viza diretamente ba kofre estadu, ida seluk mak sira nia gastu durante sira estadia iha Dili laran, ita halo survei iha tinan kotuk wainhira sira tun ona iha Timor sira gastu pur volta US$ 50 too US$ 70 kada loron, gasta ba sosa ai-haan no buat seluk-seluk tan, nunee mos importante mak gastu iha rai laran,” dehan Diretor Jeral Turizmu, António da silva ba jornalista sira iha Portu Dili, Sesta nee (20/06/25).
Antonio esplika, turista sira mai para hodi esplora nasaun, tanba ita nia nasaun potensia boot ba iha merkadu, tuir ita hateten tinan-tinan mos iha vizita ho roo fuzeru neebe ho kapasidade kiik oan sira nee 100 too 200.
Aleinde nee mos Kompanhia ANEL Ajensia do Porto, Emigio Esteves nia parte haktuir vizitante turista sira sei estadia durante loron 32 hodi vizita sitiu turistiku sira iha Timor Leste.
“Iha roo laran nee sira hamutuk nain 18, roo nee too horiseik loraik tuku 05:00, neebe ohin mak sira atraka mai iha Portu Dili nee, tuir planu Domingu kalan ou Segunda dader sira ba fali Atauro, nunee mos sei ba Jaco no fatin seluk-seluk tan, planu mos sira sei hela iha Timor durante loron 32,” nia hakruir.
Enkuantu turistika sira mai husi Nasaun Bulgaria nain 1, Ukrania nain 1, Uruguai nain 1, restu nee Filipina, no roo refere mai husi Nasaun Australia.
(EST 1)
