DILI, STLTIMORLESTE.com – Roo Forsa Auto Defeza Japaun “OHSUMI” neebe atraka iha Portu Dili, objetivu vizita nee hanesan parte iha kruzeiru formasaun esterna husi Auto Defeza Maritima Japaun nian iha Timor Leste (TL).
Komandante Komponente Navál, Komodoro Higinio das Neves dehan, atu promove amizade no vontade diak entre Japaun no TL, partikularmente forsa Auto Defeza Japaun no ba FALINTIL-Forsa Defeza Timor Leste (F-FDTL).
“Hau mos derepente horiseik Gabinete Ministeriu Defeza telefone hau katak, roo Japaun nian vizita tanba ohin hau mai,” hatete Komandante Komponente Navál, Komodoro Higinio das Neves ba jornalista sira iha Portu Dili, Kinta (14/08/2025).
Nia hatete, daudaun nee instituisaun F-FDTL halao hela preparasaun ba loron FALINTIL, maibe sira nia vizita nee mai, nomos hodi bainhira nee ajuda material mai hodi ajuda ba iha ezersísiu haree hamutuk nee.
“Sira nia vizita nee importante liu ba ita Timor, tanba iha nia ofisiais lubuk ida mak graduasaun husi Japaun, no vizita nee mos hatudu sira nia vontade, oinsa hakarak servisu iha Timor, no ita mos simu ho fuan nakloke, tanba ita senti katak, Japaun nia prezensa mai ita nia rain, aumenta ita nia ema ninia kapasidade para atu iha konhesimentu diak hodi servi ita nia rain,” nia esplika.
Iha fatin hanesan, Embaixador Japaun ba TL, Tetsuya KIMURA informa, Roo Forsa Auto Defeza Japaun “OHSUMI” mai iha nee atu halo vizita kortejia ida ho Ministeriu Defeza nomos halo treinamento iha TL.
“Roo nee halo hela treinamentu, maibe laos iha Timor, durante sira halo trenamentu nee atu mai halo vizita, maibe ita nia objetivu mak atu halo relasaun bilateral entre Japaun ho TL,” nia hatutan.
Nia koalia, roo forsa Auto Defeza Japaun “OHSUMI” ninia kapitaun sei hasoru Ministeriu Justisa nomos Ministériu Defeza durante loron 3 iha TL.
(jen)
