DILI, STLTIMORLESTE.com – Roo Kruzeiru Paul Gauguin husi nasaun Fransa tula turista nain 230 no Crew 213 vizita Timor Leste (TL), hodi vizita fatin turizmu sira iha Kapital Dili inklui Maubara no Likisa.
Iha biban nee, Platao N. hanesan mos nain ba Bountry Timor Tours ba jornalista sira iha Portu, Dili, Sabadu (12/04/2025) hatete, Roo Kruzeiru Paul Gauguin atraka iha Timor Leste iha tuku 08:00, nunee turista sira sei vizita fatin turizmu sira iha Dili laran inklui vizita ba Maubara no Likisa.
“Roo nee mai husi Fransa mak mai iha nee no roo nee tula turista 230 no fahe mos ho crew 213 no pasajeiru neebe agora tun foti pakote ba vizita iha ilha istoria sira Maubara no Likisa hamutuk 103,” dehan nia.
Nia hatete, Roo nee atraka iha Timor Leste iha tuku 08:00 nia laran, no turista sira vizita fatin turizmu sira nee iha oras 4 nia laran.
Turista vizita fatin turizmu sira ho Bis Trouble no balun neebe vizita fatin besik ho taxi, fatin neebe turista sira ba vizita mak hanesan Kristu Rei, Muzeum, Santa Kruz, merkadu tais, fatin turizmu iha Maubara no Likisa.
Nia hatutan, bainhira remata Vizita, Roo Paul Gauguin sei kontinua viajen ba Labuan Bajo Indonezia.
Nunee mos Jorge Ribeiro husi Kompanhia ou Ajensia Lai Ara hatutan, Roo Paul Gauguin nee husi Indonezia Pulau Komodo mak liu mai Dili, Pasajeiru 236 nomos ho nia Crew 218, loron tomak sira atraka iha nee no pasajeiru sira sei pasiar ba fatin Turizmu sira iha Dili laran no balun sei ba Likisa, no lokraik tuku 04:00 ka tuku 05:00 lokraik sira sai fali ona ba Darwin Australia,” katak nia.
Tuir observsaun neebe mak STL hetan, Roo Kruzeiru Paul Gauguin atraka iha Portu Dili iha oras tuku 07.00, no turista balun vizita ba iha Likisa no Maubara, no balun vizita ba Kristu Rei, João Paulo, balun lao halimar iha kapital Dili laran.
(eme)
