DILI, STLTIMORLESTE.com – Tribunal Judisial Primera Instansia Dili halao julgamentu ba arguidu ho inisial RSB, tanba komete krimi hasoru lezadu ho inisial ZS.
Prosesu nee MP akuza arguidu ho krime Armas Brankas, iha sala julgamentu laran Juiz haree la prienxe ba krimi refere, tanba nee halo alterasaun kualifikasaun juridika ba fali iha krimi Ofensa Integridade Fizika Simples neebe previstu iha artigu 145 husi Kodigu Penal.
Tribunal konsidera krimi Ofensa Integridade Fizika Simples ho natureza semi publiku tuir artigu 272 husi Kodigu Penal fo dalan atu bele dada fila, kuandu vitima ba iha prosesu nee aseita.
Ba prosesu ida nee lezadu neebe hanesan vitima ba iha prosesu nee aseita atu dada fila krimi refere, maibe ho kondisaun katak, arguidu tenke taka fali kanek neebe lezadu hetan.
Arguidu mos aseita atu taka fali kanek neebe lezadu hetan ho osan US$ 1.500.000. Ikus mai lezadu mos aseita ho arguidu nia hanoin.
Tanba nee, Prokurador no Defeza husu Tribunal atu homologa prosesu refere. Tanba nee, Juiz Prosesu deside valida ba ezistensia homologa sentensa no absolve arguidu husi instansia.
Tribunal mos fo advertensia atu iha futuru arguidu labele halo tan aktu hanesan nee ba ema seluk, tanba aktu neebe arguidu halo daudaun maske homologa, maibe sistema rejista hela.
Tuir kronolojia neebe iha katak, iha fulan Janeiru nee akontese iha Bekora, momentu neeba arguidu ho kondisaun lanu konduz motor too iha estrada ninin haree lezadu hamriik hela, arguidu halo kedan asaun sona lezadu no kanek.
Audensia julgamentu nee prezide husi Juiz Singular, Jose Maria, MP reprezenta husi Prokuradora Ivonia Guterres, arguidu hetan asistensia legal husi Defensor Publiku Sergio Dias Quintas.
(ter)
