DILI, STLTIMORLESTE.com – RYLA Timor Leste kontinua halibur joven sira, hodi fo kapasitasaun no prepara rekursu hodi kompete, bainhira Timor Leste tama membru full ASEAN.
Diretor RYLA TL Octavio da Silva Monteiro dehan, TL atu tama ASEAN nee mos vizaun inisia depois Timor hamriik hanesan nasaun. Husi joven RYLA TL nia fiar katak adezaun ba ASEAN hanesan mos oportunidade ida inklui iha mos dezafiu neebe mak mak sei infrenta no husi RYLA-TL nafatin iha optimista hodi kria atividade no produs rekursu humanus neebe mak kualidade atu bele kontribui diak liu ba prosesu kontrusaun estadu no nasaun responde ba nesesidade sira neebe mak ligado ho politiko externu nia.
“Ami kontente ho alumni RYLA-TL lubuk ida mak partisipa iha estudu komparativu neebe mak fasilita husi Embaixada Amerika nomos ba nasaun sira husi ASEAN nian no membru lubuk ida mos hola parte iha joventude ba lideransa ASEAN nia, ida nee mos hanesan parte ida ba joven sira atu esplora diak liu tan esperensia sira neebe mak ligado ho assuntu ASEAN nian,” katak Diretor nee ba jornalista iha Palasiu Prezidensial Nikolau Lobato, Bairo Pite, Segunda (13/10/2025).
Nia hatete, sira mos asume responsablidade katak futuru nasaun nia tempu ruma sei too joven sira nia liman, entau husi agora hahu prepara aan diak liu tan, kontinua bele konsolida malu kria pas no establidade, no hanorin malu fahe esperensia diak ba malu, tulun malu oinsa bele sai husi tempu sira difisil nunee ikus Timor oan sira hamutuk hodi kontribui ba nasaun neebe diak liu ba povu nia moris no ba futuru nasaun.
Nia hatete, sira mos iha programa bolu programa estagiu professional ida nee foka ba alumni RYLA sira neebe mak remata ona sira nia estudu, maibe seidauk iha esperensia iha serbisu professional. Entau sira halo koperasaun ho parseru sira atu bele haruka sira ba aprende fulan 6 nia laran atu bele aprende no koinese serbisu nee oinsa.
Nia hatete, husi numeru sira nee lubuk ida mak hetan oportunidade serbisu iha NGO neebe durante nee sira halao estajiu professional ba, no husi atividade RYLA nia preparasaun sira bele forma joven sira neebe preparadu no kualidade bele kontribui ba prosesu durante serbisu iha neeba.
Jornalista: Emerenciana Pinto
Editora: Domingas Gomes
