DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial JV, tanba bosok lezadu ho inisial TBS fo osan atu halo leilaun ba karreta, maibe ikus mai la konsege.
Tuir akuzasaun neebe Juiz Prosesu Afonso Carmona lee sai iha loron Segunda nee katak, iha loron 17 fulan Outubru tinan 2021, iha tuku 09:30, arguidu telefone ba lezadu no introduz nia aan katak, nia funsionariu publiku iha DNTT no patrimoniu Estadu iha Balide, nia mak responsável ba prosesu leilaun karreta no motorizada sira. Mezmu nunee iha altura neeba, lezadu seidauk hasoru arguidu no la konhese arguidu.
Liu husi konversa telefone, lezadu hateten ba arguidu katak, nia presiza karreta TRITON tanba nee arguidu mos hatan ho diak, katak iha neeba karreta TRITON barak mak ho kondisaun estável, tanba nee mak arguidu husu ba lezadu atu fo uluk osan US$ 400 ba nia atu trata uluk dokumentus prosesu leilaun karreta TRITON nian.
Iha loron nee kedas, lezadu ho nia kaben DF ba hasoru malu ho arguidu iha Edefisiu BNCTL Obrigadu barak nia oin, iha neeba lezadu entrega uluk osan US$ 400 ba arguidu.
Iha loron 18 fulan no tinan hanesan, iha oras tuku 10:00 arguidu kontaktu tan ba lezadu husu atu aumenta osan US$ 3.600 atu hatama ba sistema leilaun nian iha BNCTL, tanba nee mak iha tuku 14:00 lezadu nia kaben ba hasoru malu ho arguidu iha BNCTL Obrigadu Barak nia oin, hodi entrega osan US$ 3.600 ba arguidu.
Iha loron 19 fulan no tinan hanesan, iha oras tuku 18:00 arguidu kontaktu ba lezadu, husu lezadu atu kompleta dokumentus ho tan osan US$ 400, tanba ema barak mak hatama sira nia dokumentus ho osan boot. Tanba nee mak loraik lezadu ba deit iha arguidu nia uma, hodi entrega osan US$ 400 ba arguidu.
Lezadu entrega tiha osan total US$ 4.400, arguidu hateten ba lezadu katak, hein deit kleur liu semana rua sei taka lezadu nia naran iha kuadru avizu no arguidu rasik sei telefone ba lezadu atu ba direta koko karreta neebe leilaun nia kondisaun.
Liu tiha semana rua, lezadu ba iha edifisiu Patrimoniu Estadu Balide, haree nia naran iha kuadru avizu maibe nia naran la iha.
No lezadu ba husu informasaun iha funsionariu ida Patrimoniu Estadu nian kona-ba naran leilaun karreta nian nee, maibe funsionariu nee esplika ba lezadu katak, sira seidauk publika naran manan nain ba leilaun karreta nian. No funsionariu nee mos hatete ba lezadu katak, ema ho naran JV la servisu iha Patrimoniu Estadu no nia bosok ona lezadu, tanba nee fo hatene ba lezadu hodi hatoo keixa.
Iha loron 23 fulan Marsu tinan 2023 lezadu telefone ba arguidu sira nain rua konsege hasoru malu iha Eskuadra Polisia Vera Kruz, arguidu deklara atu devolve lezadu nia osan.
Iha deklarasaun nee arguidu konfesa tuir faktus sira neebe temi ona, no promete atu fo fila lezadu nia osan US$ 4.400 iha loron 25 fulan Maiu tinan 2022 tuku 14:00.
Too iha data neebe temi iha deklarasaun, arguidu bosok tan la kumpri nia promesa nee too agora, tanba nee mak lezadu mos hato keixa kontra arguidu.
Tanba nee, Ministeriu Publiku akuza arguidu ba iha krimi Uzurpasaun ba Funsaun no Burla Agravadu neebe previstu iha artigu 267 no artigu 195 Kodigu Penal.
Hatan ba akuzasaun neebe iha, arguidu konfesa ba faktus katak, akuzasaun neebe iha loos hotu. No faktus ida neebe lalos mak arguidu la deklara ba lezadu katak, arguidu hanesan funsionariu ida, no momentu neeba arguidu ho lezadu konhese malu diak hanesan kolega.
Arguidu rekonhese nia aan katak, foti duni lezadu nia osan, no arguidu hanesan broker, maibe arguidu mos rekonhese nia hahalok nee lei bandu, no arguidu promete sei fo fila lezadu nia osan iha fulan Junhu tinan nee.
Lezadu haforsa tan akuzasaun katak, momentu neeba lezadu la konhese arguidu ida, maibe arguidu mak telefone lezadu hodi informa kona-ba leilaun karreta.
Lezadu mos husu arguidu atu fo fila lezadu nia osan tuir akordu neebe lezadu hatoo ona iha Tribunal.
Rona tiha arguidu no lezadu, iha alegasaun Prokurador Ozorio de Deus mantein ho akuzasaun neebe iha, husu Tribunal atu kondena pena prizaun tinan 4 ba arguidu, no husu mos arguidu atu fo fila lezadu nia osan.
Enkuantu husi parte Defeza Sergio Dias Quintas husu Tribunal aplika pena suspensaun ba arguidu, tanba arguidu deklara ona katak, sei fo fila lezadu nia osan iha fulan Junhu.
Rona tiha deklarasaun nee, Tribunal adia ba loron seluk hodi rona desizaun.
Audensia julgamentu nee prezide husi Juiz Koletivu, Afonso Carmona, Fransisca Cabral, Jose Escurial, Ministeriu Publiku reprezenta husi Prokurador Ozorio de Deus, arguidu hetan asistensia legal husi Defensor Publiku Sergio Dias Quintas.
(ter)
