DILI, STLTIMORLESTE.com – Sai Katekista nuudar vokasaun ida, basa Nai mak bolu hodi haklaken Maromak nia liafuan ba ema seluk.
Lia hirak nee hatoo husi Katekista Lesibutak Parokia São José Aimutin, Mariano Agostinho da Cruz ba STL iha Aimutin, Kuarta nee (06/11/2024).
Nia dehan, sei tinan 8 hatene reza tersu nunee hamutuk katekista sira seluk reza iha bairu laran, wainhira iha fulan Maiu no Outubru nian, sai katekista haklaken no habelar pastoral Maromak nian, iha tinan 1980 hahu halao knaar nuudar katekista, maibe voluntariu.
“Katekista nuudar vokasaun ida ba hau, Nai bolu hau hodi haklaken nia Liafuan ba ema seluk, tanba liu husi biblia dehan lao ba haklaken hau nia liafuan ida nee ba ema hotu, buka tuir hau bibi sira neebe namkari, tanba nee ohin loron sai nafatin katekista” hatete Katekista Mariano.
Knaar katekista tuir nia hanesan vokasaun ida laos atu buka oin ou buka osan ou riku soin, maibe lae hadau hau nia klamar.
Maski hasoru dezafiu oin-oin, maibe labele haluha Nai Maromak iha moris situasaun saida deit, basa o husu nia fo, dere odamatan, odamatan loke, tanba nee la para iha dalan klaran maibe luta nafatin lao, basa knaar nee Nai fo ona hodi halao.
Ho nunee hahu husi tinan 1980 too agora beioan ona sei la baruk, maibe vontade haksolok ho haraik aan halao knaar neebe Maromak fo hela.
“Se laos vokasaun hau nia hakarak dala ruma nesesidade la too, hanoin ida diak liu sai duke hili fatin seluk servisu para moris diak, maibe lae ida nee la hanoin too iha neeba, maibe Nai mak bolu hau prontu hodi lao, tanba nee sente haksolok fuan ho laran hodi servi Nia,” hatete Katekista Mariano.
(joa)
