DILI, STLTIMORLESTE.com – Hela semana Timor Leste (TL) sai ona membru Associação de Nações do Sudeste Asiático (ASEAN), presiza iha kapasidade no konhesimentu atu bele dezenvolve rejional iha ASEAN nian.
Kestaun nee hatoo husi Ministru Joventude Desportu Arte no Kultura (MJDAK), Nelio Isac Sarmentu ba jornalista iha Palasiu Prezidensial Nicolau Lobato, Bairru Pite, Segunda (13/10/2025).
Nia hatete, hela semana hira deit TL sai ona membru full ASEAN. Laos kontente atu tama deit, maibe presiza mos iha kapasidade atu bele dezenvolve rejional.
“Falta semana hira ita sai membru ASEAN, ita sai membru ASEAN nee laos kontente deit atu tama iha ASEAN, maibe ita iha ona kapasidade analiza no kapasidade iha koinesementu oin oin, tanba ita laos haree deit oinsa atu dezenvolve ita nia rai maibe, ita mos tama iha parte ida atu dezenvolve rejional katak Kawasan ida ASEAN nee, tanba ema haree ita laos ona Timor, maibe haree ita hanesan ema sira neebe iha ASEAN nee ba sira nia kontribuisaun hanesan pais idak idak nia, oinsa bele kontrubui involve kawasan nee,” dehan Ministru nee.
Ministru hatete, bainhira TL sai ona membru ASEAN presiza mos fo nia kontrubuisaun atu bele dezenvolve rejional kawasan iha ASEAN laos iha Timor deit.
Nunee mos Asesor Prezidensia Republika, Virgilio Babo hatete, joven sira presiza estuda nee importante, tanba ho estuda bele hasae kapasidade.
‘Estuda nee importante, estuda espesifiku ba ita nia area neebe iha, hodi nunee ita bele sai peritus iha area nee. Dala barak ita nia joventude kuaze estuda iha area ida la kleur halai fali ba ida, nufim ita lasai peritus iha area ida nee. Hanesan ezemplu ohin hau koalia ona katak, oinsa mak ita nia joventude sira bele hahu kreativu husi ideia inovativu sira,” katak nia.
Nia mos husu joven sira estuda iha area espesifiku idak idak nian, nunee bainhira TL tama ona ASEAN, Timor oan sira mos hatudu ba membru ASEAN hotu katak Timor mos bele.
Jornalista: Emerenciana Pinto
Editora: Domingas Gomes
