DILI, STLTIMORLESTE.com – Atu garante kualidade atendimentu kada instituisaun tantu privada nomos publiku, presiza iha rekursu umanus neebe natoon, atu nunee bele fo atendimentu diak ba publiku, hanesan mos sala Patologia Forensik Hospital Nasional Guido Valadares (HNGV) neebe lo-loos tenke iha rekursu umanus.
Xefe Departementu Patologia no Forensik HNGV, Nilton Tilman Gusmão dehan, rekursu umanus neebe menus, liu-liu pesoal saude prezudika atendimentu ba publiku dala ruma tarde, tanba ema nain rua deit.
“Rekursu umanus iha nee problema oituan, hau lakohi tanba hanesan nee, mediku sira neebe mak halo autopsia nee numeru diak, mais ita nia asistente sira neebe mak ajuda asegura trabalhu diariu nee menus tebes-tebes,“ hatete Xefe Departementu Patologia no Forensik HNGV, Nilton Tilman Gusmao ba jornalista sira iha sala Mortuariu HNGV, Kuarta (06/11/2024).
Nia preokupa tebes ho situasaun nee, tanba dala barak hetan protesta makaas husi familia mate isin, tanba hetan atendimentu kleur.
Nia esplika, preokupasaun kona-ba menus pesoal asistente nee laos foin akontese, maibe dezde nia mandatu kuaze tinan 5 ou 6 ona akontese, no hetan beibeik ona protesta husi familia mate isin husi HNGV, neebe dala ruma tama barak iha sala patologia Forensik.
Tuir nia, hanesan sala Patologia Forensik uniku iha Dili laran, neebe durante nee simu mate isin husi fatin-fatin liu-liu HNGV, lo-loos tenke tau ema barak, atu nunee bele fo atendimentu ba publiku ho diak no lais, maibe na realidade nain rua deit.
(jen)
