Salariu Profesores Lao Normal, Hein Renumeratoriu

DILI, STLTIMORLESTE.com – Salariu kada fulan ba profesores neebe koloka ona faze primeiru lao normal hanesan baibain, maibe renumeratoriu mak too agora sira seidauk hetan.

Kestaun nee hatoo husi Profesora Materia English, Juvita de Jesus Lopes da Costa husi EBC Manleuna ba STL iha EBC Manleuana, Segunda nee (14/10/2024).

“Hau hanoin kona-ba renumeratoriu ninia nee agora daudaun seidauk tama, ami profesora neebe koloka iha faze primeiru nian mai iha eskola ida nee, maibe ami sei nafatin hein deit, bainhira mak husi ministeriu atu fo ami nian transporte no alojamentu ninia, neebe agora daudaun sei iha prosesu nia laran, nuudar profesores ho pasiensia hein deit. Kona-ba salariu agradese tanba lao diak no normal hela,” nia deklara.

Nia afirma, kona-ba renumeratoriu ninia nee hahu husi fulan neebe mak sira simu tomada de pose iha fulan Maiu tinan nee, tanba tuir informasaun neebe asesu husi kolega sira katak, renumeratoriu nee sei iha prosesu nia laran.

Iha fatin hanesan, Diretor EBC Manleuana, Carlos Correia afirma, renumeratoriu nee mak seidauk hetan, maibe profesores sira nian salariu kada fulan nee lao normal, tanba iha kolokasaun ba faze primeiru ninia mai iha eskola ida nee profesores nain 2.

(jac)