DILI, STLTIMORLESTE.com – Sarani Aimutin Sentru simu ilas Nain Feto no São Jose husi sarani Parokia São José Aimutin.
Misa tuku 04.30 loraik nian sai iha tuku 06.00 kalan, sarani sira husi Parokia São José Aimutin kontinua lori ilas Nain Feto ho São Jose akompanha reza no kanta hodi entrega ba iha Aimutin Sentru.
“Sarani sira hatene ona katak fulan Maiu no Outubru sempre iha vizitasaun ilas Nain Feto no São José ba vizita sarani sira oinsa atu hakbesik Nia oan sira hodi simu no rona direta preokupasaun, halerik terus no susar husi ita nia sarani idak-idak, hodi hatoo ba Nain Feto no São Jose, tanba nuudar umanu iha frakeza parte isin no klamar nian,” hatete Konselheiru Komisaun Organizadora, Abel Santos Soares ba STL iha Aimutin Sentru, Domingu nee (04/05/2025).
Nia dehan, atu simu ilas Nain Feto no São Jose sarani hotu kolabora ho diak, tan nee husi inisiu forma ekipa tau fiar ba iha joven sira, oinsa bele motiva joven sira hatudu dalan lialos ba joven sira no lori joven sira hakbesik ba Maromak liu husi vizitasaun ilas Nain Feto no São Jose, ida nee atu joven sira mos envolve aan iha dalan naroman nian.
Tanba agora ema barak hadook aan husi Maromak, maibe husi vizitasaun ida nee tama sai bairu sentru sira dada sarani hakbesik ba iha Maromak.
“Ami agradese no orgulhu, tanba husi partisipasaun sarani sira prontu simu ilas Nain Feto no São Jose vizita iha fatin da nee,” dehan nian.
Nia informa, prezensa ilas Nain Feto no São Jose iha Aimutin Sentru kalan rua loron tolu, depois iha loron 6 Maiu 2025 sei entrega ba Bairu Aimeti Laran.
Iha vizitasaun ilas Nain Feto ho São José durante nee halao tuir orariu neebé iha ona, ohin ilas too mai reza hotu agora kontinua halo formasaun ba sarani sira, depois formasaun sarani sira iha Bairu Aimutin Sentru kada bairu halo venerasaun tuir orariu neebe iha ona too ilas Nain Feto ho São José sai ba bizita bairu seluk.
Tanba nee, relasiona ho vizitasaun ilas Nain Feto ho São Jose nian, vizilansia makaas husi joven sira, oinsa joven sira matan moris neon nain hatudu duni valores fiar nian liu husi prezensa ilas Nain Feto ho São Jose iha Sentru nee.
(joa)
