DILI, STLTIMORLESTE.com – Sarani Arkedioseze Dili halao prosesaun husi Igreja Motael ba iha Monumentu Nain Feto Lecidere, selebra tinan 107 Aparisaun Nain Feto nian pastorinhos ba bibi atan nain 3, Lucia, Francisco no Jacinta, iha rai Cova da Iria.
Selebra Aparisaun Nain Feto nian iha loron 13 Outubru, maibe loron 13 Outubru monu iha loron Domingu, entaun selebra iha loron 12 Outubru, sarani halao prosesaun husi Igreja Motael ba iha Monumentu Nain Feto Lecidere.
“Ohin ita partisipa iha prosesaun ida nee hodi komemora tinan 107 Aparisaun Nain Feto nian pastorinhos ba bibi atan nain 3, Lucia, Francisco no Jacinta, 13 Outubru 1917, iha Cova da Iria Portugal,” hatete Vigariu Jeral Arkedioseze Dili, Padre Graciano dos Santos Barros iha omilia selebrasaun Aparisaun Nain Feto iha Monumentu Nain Feto Lecidere, Sabadu nee (12/10/2024).
Nain Feto eskolha labarik enosente sira hanesan kolaboradores primeleziadus atu kombate ema moras no pekadu ema nian, la ho armas l modernu no teknolojia sira sosfitikada, maibe ho armadas de orasaun, penitensia, sakrifisiu no sofrimentu.
“Tanba sa resposta mak ida nee, metode de servisu Maromak nian la hanesan ho ita ema nian, Nai Maromak hili ema sira fraku no kiik sira ba nia projeitu sira, nia husu ita atu uza deit orasaun, penitensia, sakrifisiu, kruz terus hodi transforma ita nia mundu,” hatete Pe. Graciano.
Tanba nee mensajen importante iha aparisaun iha Fatima nee reza tersu loron-loron atu funu iha mundu remata no mundu hetan pas, halo sakrifisiu barak ba konversaun pekadores nian.
Pe. Graciano hatete, Aparisaun iha Fatima, bibi atan ida husi nain 3 nee Lucia husu ba Nain Feto saida mak ita hakarak mai ami, Nain Feto hatan hau hakarak imi harii iha nee hau Kapela ida, hau mak Nossa Senhora do Rosário, Nain Feto husu ba bibi atan nain 3, no husu ba ita hotu atu ita iha presebransa iha ita nia orasaun sira.
Fulan Outubru fulan Maria nian, husu ba ita atu halo intensaun sira neebe temi iha leten, Nain Feto mos husu atu harii Kapela Igreja laos halo interpretasaun sentidu fiziku, maibe iha sentidu edifikasaun da Igreja, viva povu Maromak nian, Nai Jesus no Fatima konvida ita atu sai nia mensajeiru hodi lori domin ba sira neebe la hetan domin no lori esperansa ba sira neebe moris iha mukit no kloot laran, husu fo liman ba malu hodi harii mundu mais umanu justru no prosperu.
(joa)
