BAUKAU, STLTIMORLESTE.com – Sarani Bairu Badulu neebe partense iha Aldeia Waimanuboe no Watubala Suku Wailili, Postu Administrativu Baukau Vila, Munisipiu Baukau, kontente hodi simu saun Jose vizita sira nia bairu.
Kada Tinan Padre, hamutuk ho katekista no sarani (Waiwatu) Waimanuboe no Watubala sempre lori Saun Jose husi kapelina Waimanuboe, hodi vizita sarani bairru idak idak, ou uma kain idak idak neebe partense iha Aldeia rua refere.
No tinan ida nee monu iha sarani Badulu, no bainhira saun Jose too iha bairru simu ho lian Dadoli neebe lee husi Estudante, Nalcia Maria Sarmento hodi hatoo bemvindu ba Saun Jose neebe ho laran luak vizita ona sira nia bairru no iha biban nee nia husu saun Jose, atu akompanha sira sira hadook husi hahalok arogansia fo ba sira esperitu domin, nunee sira nia bairru bele moris hakmatek.
“Bemvindu Aman doben Saun Jose, Ohin ita hit aan mai iha ami nia bairru ida nee, ami tuku tuur ho fuan simu ita mai hela hamutuk ho ami. Aman doben Saun Jose, ho ita nia vizita ida nee, lori esperansa mai iha bairru ida nee, halakon ami nia arogansia neebe ami iha, hadook ami husi laran makerek sira, hadook ami husi foti aan sira, mai ba lori esperansa ksolok haraik aan, unidade, dame no pas iha ami nia bairru ida nee liu liu ami nia aldeia Waiwatu,Aman doben saun Jose mai ba, Aman doben, mai hela ho ami aman doben, ami simu ita ho fuan tomak, no hahi ita tanba ita neebe hetan premio lalehan tanba sai aman neebe simples obidese, no pasensia hodi hakiak ami nain Jesus, ita hadomi knaar loron loron nuudar dalan atu hetan santidade, iha ita nia vizita ida nee husu haraik grasa ba ami nia aman sira sai ezemplu tuir ita boot nia attitude,” dehan Nalcia liu husi orasaun simu, iha Bairu Badulu, Sabadu (25/10/2025).
Aman Saun Jose neebe badinas buka sustenta Familia Nazare, liu husi serbisu simples nuudar badaen, tanba nee sira hili nuudar aman protetor hodi reza tulun ba sira nia familia idak idak, hadook ami husi Odi Vigansa, laran moras malu, nunee amibele moris iha pas no dame nia laran, tulun hatene agradese ba serbisu loron loron, haraik matenek ba sira neebe sei halao estudu, buka hela serbisu sai nafatin reza nain ba sira.
Iha biban nee Padre Selebrante Padre, Manuel da Silva Ximenes husi omilia hatete, kontenti hodi mai selebra misa eukaristia nee hamutuk ho sarani sira, no preveleizu ida katak ho vizita saun Jose bele vizita ona sarani sira.
Padre hatete, saun Jose ema neebe simplisidade no virtude premeiru mak fiar, saun Jose nia fiar ba Maromak.
“Nia fiar metin nia lafiar karik nia husik ona Maria, Maibe nia fiar liafuan neebe husi Anjo katak hola nia, ida neebe iha knotak laos husi ema maibe husi esperito Santo nia kbiit, no saun Jose obedese ba Maromak nia liafuan, tanba nee mak sai modelu ba ita fiar,” dehan Padre.
Padre dehan, tenke fiar iha Maromak, no saun Jose nia simplisidade, iha biblia lahakerek barak koalia konaba saun Jose, Maria mak koalia barak saun Jose koalia oituan deit tanba hatudu ninia simplisidade ninia haraik aan, maibe keta haluha mos saun Jose nia responsablidade ba Familia.
Tanba nee nafatin harohan ba aman sira hodi fiel no responsablidade tuir Saun Jose hodi responsablidade iha familia hodi matan ba oan sira.
Nia hatutan, bairu Badulu sarani husi bairru rua Waimanuboe no Watubala, (Waiwatu) no aldeia rua hamutuk mak Waiwatu aldeia rua tenke servisu hamutuk, unidade haraik aan ba malu pasensia no obidese ba malu tulun malu.
“Se Waiwatu hakarak sai unidus tenke hatudu husi ema idak idak nia hahalok nunee lori Waiwatu nee bele hamutuk iha unidade, maibe kuandu aldeia rua naran tau hamutuk maibe hahalok ema idak idak laiha unidade nee lajeitu,” dehan nia.
Iha biban nee Padre husu sarani husi aldeia rua nafatin kria unidade no ho saun Jose nia vizita, bele fo mentalidade foun no inspirasaun foun hodi haburas esperitu Waiwatu tuir saun Jose nia virtude.
Jornalista: Emerenciana Pinto
Editora: Carme Ximenes
