BAUKAU, STLTIMORLESTE.com – Sarani sira iha Postu Administrativu Kelikai, Munisipiu Baukau, deskontente ho atendimentu sertidaun batizmu iha Parokia Santa Terezinha Kelikai.
Deskontente nee bazeia ba sarani SDC neebe oan sarani liu ona fulan 7, maibe kartoriu Parokia Santa Terezinha Kelikai seidauk produz sertidaun batizmu iha loron 12 Maiu nee, tanba razaun pesoal labra naran ba livru asentu iha Parokia Kelikai kondisaun daudaun moras struk.
“Ami sarani mos deskontente ho atendimentu. Haree ba realidade iha katak, ema neebe servisu atu labra dokumentu nee oras nee daudaun moras, tinan kotuk kedas too ohin loron labele tama kartoriu,” hateten sarani Parokia Kelikai, Januário Freitas ba jornalista sira iha Kelikai, Domingu (18/05/2025).
Pesoal labra naran ba livru asentu Parokia Kelikai, daudaun kondisaun moras struk, parte sarani sira husu Amu Paroku Kelikai atu fihir pesoal balun hodi substitui servisu iha kartoriu nunee bele fasilita sarani sira ba atendimentu sertidaun batizmu nian iha Parokia Kelikai ho lais. Maibe daudaun odamatan kartoriu Parokia Kelikai taka no la simu atendimentu publiku.
“Ema seluk bele troka nian atu nunee labra dokumentu atu ami sarani mos foti ami nia dokumentu lais. Ami nuudar sarani rekomenda ba Amu buka lalais suplente bele troka nian,” Januário Freitas rekomenda.
Mezmu nunee, sarani Parokia Kelikai konsiente atu pasa naran ba livru asentu Parokia nian hodi sai dokumentu legal, laos dokumentu baibain, maibe dokumentu importante Igreja nian neebe tenke hakerek ho liman, maibe letra tenke moos no uza alfabetu português, tanba Igreja asegura ba tinan naruk.
Liga asuntu nee, STL tenta konfirma ho Amu Paroku Santa Terezinha Kelikai, Padre David Savio, SDB maibe laiha fatin atu fo komentariu, maibe iha loron 13 Maiu nee deklara ona katak, parte Parokia esforsu ona no sei substitui pesoal neebe moras struk hodi halo hikas atendimentu ba sarani sira trata dokumentus.
(tom)
