DILI, STLTIMORLESTE.com – Sarani ho kontente simu Cruz Joven Internasional, neebe too Timor Leste iha oras 01:53 OTL, ho Aviaun Aero Dili.
Cruz Joven Internasional simu husi Korea do Sul, neebé akompanha husi delegasaun Korea nomos joven TL. Cruz Joven Internasional iha TL durante semana ida, hahú husi loron 23-30 Agostu 2025, no sei fila hikas ba Thailandia.
Cruz Joven Internasional too simu husi Sua Eminencia Dom Virgilio Cardeal do Carmo da Silva, SDB, akompanha husi Prezidente Comisaun Nasional Juventude Catolika Timor Leste (CNJCTL), Padre Francisco Indra do Nascimento Tey Seran, Padre Anacleto Pires, SDB, Amu Paroku Santo Antonio Lacluta Vikeke, Abel Soares nomos amu sira seluk.
Nunee tara tais no simu kultura husi Vigararia Vikeke Dioseze Baukau, depois remata ho kultura sarani sira halo prosisaun husi Aeroportu Internasional Nicolau Komoro too Se Katedral Dili, nunee tuir dalan akompanha reza no kanta. Iha dalan sarani sira hamriik halo orasaun wainhira Cruz Joven Internasional liu.
Sarani juventude TL, Remizia Soares da Silva hatete, nuudar joven sente kontente tanba Cruz Joven Internasional vizita rai doben TL, ema hotu hatene katak nasaun neebe kiik maibe fiar neebe boot.
“Hau nuudar foinsae fiar sarani katolika, hau kontente tebes-tebes ho prezensa Cruz Joven Internasional iha TL, hau esperansa ba Cruz Joven Internasional vizita ida nee, rai doben ida nee lori vitoria sarani tomak iha Timor liu-liu uma kreda Timor nian. TL haksolok neebe laiha rohan, lori damen ba ema sira neebe iha susar no terus nia laran,” dehan Remizi ba STL iha Aeroportu Internasional Nicolau Lobato Komoro, Sabadu (23/8/2025).
(joa)
