DILI, STLTIMORLESTE.com – Sarani Parokia Imaculada da Conçeicão Balide hamutuk ho amu paroku halo prosesaun husi igreja Balide too Lesidere, ho intensaun atu hasae orasaun ba Maktoban Sua Santidade Papa Francisco.
“Ohin tinan 2025 hanesan lutu boot ida ba sarani katolika iha mundu tomak, hanesan sarani kristaun katolika, ohin hamutuk ho ami nia amu paroku Parokia Imaculada da Conceição Balide, Anjelo Salsina hamutuk ho sarani hotu-hotu husi Parokia Balide lao ain halo prosesaun husi Parokia Balide mai too iha Largo Lesidere,” dehan sarani Parokia Imaculada da Conceição Balide, Albertina Araújo ba jornalista STL iha Largo Lesidere, Tersa nee (22/04/2025).
Nia dehan, sarani sira lao ain halo prosesaun husi parokia mai too fatin ida nee, ho intensaun atu hasae orasaun ba Sua Santidade Papa Francisco nia mate.
“Ohin sarani sira lao ain halo prosesaun husi parokia mai too iha nee ho intensaun hasae ami nia orasaun ba Sua Santidade Papa Francisco nia mate neebe horiseik simu novidades tristeza boot ida mai ita sarani katolika iha mundu tomak,” dehan nia.
Nia hatutan, hanesan sarani katolika, rona novidades ida nee sente triste, laran moras no hamonu matan been.
“Hau hanesan sarani katolika rona novidades ida nee sente triste, laran moras no hamonu matan been, tanba aman domin nain katolika mundu nian husik hela nia sarani hotu fila ona ba Aman Maromak nia kadunan santu,” hatete Albertina.
(EST 4)
