DILI, STLTIMORLESTE.com – Maski movimentu sidade Dili nian neebe okupadu, sarani Katoliku sira husi kapital Dili kontinua hili Gruta Golgota Komoro, nuudar fatin prinsipal atu halao orasaun no meditasaun relijiozu.
Tuir observasaun jornalista STL iha terenu haree katak, movimentu vizitante sira nian haree aumenta liu-liu iha loron Sabadu no Domingu.
Sarani sira neebe mai laos deit husi Bairru Komoro, maibe mos husi area dook hanesan, Bekora, Bidau, Tibar no fatin seluk tan.
Vizitante ka sarani ida ho naran Mariana Cortereal informa katak, nia hili reza iha Gruta Golgota, tanba nee fo ambiente neebe nonook no dook husi barulhu karreta no motor.
“Hau mai iha nee hamutuk ho familia atu reza, tanba ambiente iha nee diak tebes ba ita neebe hakarak halo meditasaun ho kalma no hakmatek,” dehan Mariana ba STL foin lalais nee.
Aleinde sai fatin orasaun, Gruta Golgota mos sai hanesan destinasaun turizmu relijiozu neebe importante iha Dili.Viziztante sira husu ba parte kompetente ka komunidade lokal sira atu kontinua fo atensaun ba kestaun limpeza no seguransa iha area neeba, para labele akontese krime ruma.
Iha fatin hanesan sarani Daniel de Oliveira hatete, orasaun neebe nia hasae ba nain Feto mak, husu atu hadok nia husi tentasaun aat sira. ”Hau mai iha nee atu buka hakmatek no husu ba nain Feto atu hadok hau husi tentasaun aat sira,”.dehan Daniel.
Entretantu Gruta Golgota mak sai sasain fiar ba sarani Timor-Leste (TL) nian neebe metin. Hari iha dekade ka tinan hirak liu ba, fatin nee sai ona hanesan pulmaun espiritual ba sarani ka komunidade sidade Dili.
Tanba tuir sira Golgota mak fatin atu foti fuan, husi moris loron loron nian neebe nakonu ho stres no seluk tan. Iha neebe la iha distinsaun entre riku ka kiak, hotu hotu mai ho haraik aan, hamriik ka tur iha estatua nain Feto nia oin hodi hatoo sira nia laran susar no esprensa.
(car)
