DILI, STLTIMORLESTE.com – Nuudar ema kristaun Katolika nafatin hatudu valores espiritual tulun malu, no prepara aan hodi sai ida deit iha moris loron-loron.
Lia hirak nee hatoo husi Padre Richardo Pasang, SVD liu husi nia refleksaun ba loron Sesta (25/10/2024).
Nia hatete, nuudar Katolika atu moris tuir valores Kristaun atu iha sensibilidade espiritual katak tulun malu ho domin. Semana XXIX do Tempo komum Ef 4 : 1 – 6 Luc 12 : 54 – 59. Tradisaun povo tradisional ida, neebe sempre mosu wainhira iha sinais desastre perigu naturais ruma atu ema hotu bele hatene mak aviju ou samada liu husi baku besi ou bamboo, huu karau dikur ho lian neebe diferente.
Padre Richardo hatutan, bele dehan katak hanesan konde sandi ruma. Maibe, tempo agora, tempo modernu povo bele hatene liu husi sirene lian ruma hodi hatudu iha situasaun emerjensia. Instrumentu hirak nee atu fo hanoin povo sira bele kuidadu, prepara-an, pronto atu hasoru desastre ou perigu neebe sei mai. Hanesan agora atu bele hatene kona ba klimatika, rai-nakdoko, tsunami, no seluk tan liu husi AMCG (Agensia de Metereologia, Climatologia e Geofisica). Sira sei aviju antes sinais ruma ou notifikasaun ruma atu ema bele salva-an.
“Maromak nia Liafuan loron ohin husu ita tenke hatene sinais do tempu sinais espirituais sinais Maromak nia presensa iha ita leet liu husi ita nia akotesimentu diaria. Ita bele dehan ida-idak tenke iha sensibilidade espiritual (kepekaan rohani). Sensibilidade spiritual, iha parte ida sai hanesan kmanek Espiritu, iha parte seluk sai hanesan frutus husi treinamentu espiritual kontiuada. Sensibilidade espiritual neebe diak no los lori ita ba arrependimentu, kresimento no dezenvolvimento da fe no mos partisipa ativu sociais atu halo mundu, sosiedade, komunidade, no seluk tan sai fatin diak, dame ba ema hotu,” dehan Padre nee.
Iha biban nee Bibi atan kreda katolika nee, husu nafatin ba iha sarani sira hotu atu moris nafatin tuir valores Kristaun.
“Tan nee, Saun Paulo iha Primeira Leitura husu ba ita sarani Katolika atu moris tuir valores Kristaun atu iha sensibilidade espiritual kataktulun malu ho domin, la hanoin-an rasik, laran maus ba malu, pasiensia, sai laran ida deit iha Espiritu, dame malu, isin ida deit, espiritu ida deit, esperansa ida deit, fiar ida deit, batismo ida deit no Maromak ida deit. Maromak mak sei ukun ita, Nia mak lori ita, Nia iha ita hot-hotu,” katak Pe. nee.
Nee duni, ema hotu harii metin sensibilidade espiritual iha familia, komunidade no sociedade atu bele hatene Maromak nia presensa iha ema moris no iha maun-alin sira seluk no ambiente neebe haleu.
Tanba sensibilidade espiritual loke portaun ema nia solidaridade no fo frutus ba relasaun domin entre ema nuudar maun-alin.
(eme)
