DILI, STLTIMORLESTE.com – Sarani sira husi Suku Labarai, Postu Administrativu Suai Vila, Munisipiu Kovalima, husu ba Prezidente Republika (PR), Jose Ramos Horta atu apoiu material konstrusaun nunee bele kontrui kapela ida ba sira bele tuir misa no halo orasaun.
Lia hirak nee Xefe Suku Labarai, Paulo de Sena ba jornalista sira iha Palasiu Prezidensial, Nicolau Lobato, Bairo Pite, Tersa nee (08/04/2025) hatete, durante nee komunidade sira mak kontribui osan hodi halo kapela, maibe osan la too tanba nee sira husu Prezidente atu fo apoiu material ba sira.
Xefe Suku hatete, relasiona ho preokupasaun neebe mak sira hasoru, tanba nee nuudar autoridade lokal entrega ona proposta ba iha Gabinete Prezidensial Republika iha loron 9 fulan Abril 2024.
“Ohin mai konfirma fila fali proposta neebe mak hatama ba sua exelensia Prezidente Republika kona-ba ami nia kapela iha neeba iha dia 9 Abril 2024, maibe seidauk iha responde tanba nee mak ohin mai konfirma fila fali,” katak Xefe Suku.
Proposta kona-ba saida? Hatan ba kestaun nee Xefe suku hatete, proposta neebe mak sira hatama kona-ba husu apoiu ba Prezidente atu apoiu halo kapela iha aldeia laran.
“Husi proposta nee husu apoiu ba Prezidente liu-liu ba iha material, tanba iha neeba kontribui husi komunidade sira hodi halo kapela maibe agora daudaun fundu laiha ona, tanba nee mak husu apoiu ba Prezidente liu husi proposta neebe mak hatama antes ona,” katak nia.
Nia akresenta tan katak, durante nee laiha kapela tanba nee komunidade sira mak ho inisiativa rasik halo kobransa ba malu hodi kontrui maibe osan la sufisiente, tanba nee sira husu tan apoiu ba Prezidente Republika.
Nia hatutan, proposta nee hatama iha tinan kotuk ba iha Gabinete Prezidensia Republika maibe seidauk iha resposta ruma, tanba nee nia mai atu konfirma fali.
(eme)
