DILI, STLTIMORLESTE.com – Sarani husi Kapela Lessibutak sente kontente, tanba iha semana santa hetan fasilidade organ husi Prezidensia Republika (PR), Jose Ramos Horta.
Lia hirak nee hatoo husi Koordenadora Liturjia no Muzika Liturjia husi Kapela Lessibutak Manleuana, Merlinda Soares Pinto de Aquino ba STL iha Palasiu Prezidensial, Nicolau Lobato, Bairo Pite, Dili, Kuarta (16/04/2025).
Nia hatete, nuudar sarani sente kontente bainhira hetan apoiu organ husi ekipa Prezidensial Republika.
“Ami sente kontente tebes tanba iha loron Semana Santa ida nee hetan grasa Maromak nian hodi bele hetan apoiu ba fasilidade organ ho unidade ida husi Palasiu Presidensial. Ida nee hanesan ajuda tebes ami nia kapela Lessibutak Manleuana hodi fasilita selebra loron boot Paskua nian,” dehan Joana.
Nia haktuir tan katak, sente kontente tanba ho sasan neebe apoiu husi Prezidensia Republika bele fasilita sira nia atividade Igreja iha loron boot Paskua.
“Sasan nebe hetan husi Palasiu Presidensial mak organ ou piano unidade ida (1) marka Yamaha PSR 1500,” katak nia.
Nia haktuir tan katak, organ neebe hetan nee sei rai iha kapela Lessibutak neebe responsavel husi Amu Jose Valdir Siqueira ho Amu Charles nuudar Amu ba responsavel kapela Lessibutak Manleuana. No organ nee mos bele fasilita eventu misa boot ho ko konferensia sira neebe organiza husi Amu nain rua .
“Hau nia esperansa katak ba oin ami sei koko husu pedidu kona-ba sound sistem tan hanesan Speaker, Mike no TV Layar boot ruma hodi bele fasilita misa loron boot, tanba iha Kapela Lessibuta nee sarani barak mak misa entaun nia sound system la suporta hodi sarani sira partisipa misa ho diak, tanba kuandu iha loron boot sound sistem mak problema boot ba ami,” katak nia.
Iha biban nee nia mos agradese ba Prezidensial Republika neebe apoiu ona sasan nee ba sira nunee bele fasilita sira nia atividade iha Igreja.
Ekipa neebe Prezidensia Republika oferese ba Igreja nomos eskola sira tulun husi Licypriya Kangujam, enviadu espesial Prezidente Republika, Jose Ramos Horta nian no ativista ambiente ho tinan 13 mak doasaun pianu 10 ba eskola no igreja sira iha Timor Leste, inklui Kapela Lessibutak hanesan parte ida husi ninia esforsu umanitariu sira neebe halao hela iha Timor Leste.
(eme)
