DILI, STLTIMORLESTE.com – Amo Vigariu Parokia Motael hamutuk ho sarani sira realiza misa agradesimentu ba Nain Feto Guadalupe iha Parokia Motael Dili.
Iha biban nee, Amo Vigariu Parokia Motael, Padre Inocencio Barreto Lopes ba STL iha Parokia Motael, Sesta kalan (12/12/2025) hatete, ohin selebra misa hanesan memoria ida ba sarani sira neebe halo devosaun ba Nain Feto Guadalupe, liu husi halo Novena iha Gruta Ilhas Nain feto Guadalupe neebe harii iha Motael nomos iha fatin seluk.
“Ohin dia 12 dezembru ita selebra misa nain Feto Guadalupe, iha kalendariu babain memoria fakultativa deit. Maibe ba ita selebra tanba halo gruta ida iha nee depois sarani sira barak neebe iha devosaun boot tebes Nain Feto liu husi Ilhas Nain Feto Guadalupe ho gruta ida nee nia, nee duni fasilita sira, durante nee sira nia orasaun pesoal tersu neeba sira mai halo iha gruta ida nee ou bele mos halo iha fatin seluk,” dehan Padre Selebrante.
Padre mos dehan antes selebra misa agradesimentu ohin mos sarani grupu ida halao novena durante loron 9 nia laran no ohin remata taka novena ho selebra memoria ida nee, maske ida iha kalendariu universal la preve ida nee, maibe sarani neebe halo devosaun ba Nain Feto Guadalupe ohin selebra ida nee hanesan memoria halo festa ida ba sarani sira neebe halo devosaun.
“Ohin selebra ida nee hanesan memoria ida ita halo festa ba ita sira neebe halo devosaun ho sarani Katolika neebe halo devosaun boot ba Maria liu husi ilhas nain Feto Guadalupe nia,” dehan Padre.
Iha biban neec padre nomos sarani sira nafatin halo devosaun ba Nain Feto hodi husu saida mak ema ida-idak presiza iha moris hodi nain feto hatoo ba Jesus.
Selebrasaun Misa Agradesimentu nee prezide husi Amo Vigario Parokia Motael, Padre Inocencio Barreto Lopes, no partisipa mos husi Padre, Madre, no Sarani sira neebe partense ba iha Parokia Motael liu-liu sarani sira neebe durante nee halo devosaun ba nain Feto Guadalupe.
Nossa Senora De Guadalupe, Patrona Mexiku no kontinente Amerikanu nian, Loron 9 fulan-Dezembru Nia mosu ba Juan Diego iha Tepeyac (Mexiku) iha loron 9 fulan-Dezembru tinan 1531, neebe lori nia ba santu.
Nia konvida atu lori mensajen ida ba preladu atu harii templu ida. Nia simu ho laran tomak konvite nee. Templu hahu ho kapela kiik ida no ohin loron maka Bazílika Nain Feto Guadalupe nian iha neebe Saun Juan Diego, Indianu hetan kanonizasaun.
Iha neeba, Amu-Papa João Paulo II bolu Virjen Maria, “Inan Amerika nian”, iha orasaun ikus Ezortasaun Apostolika pos-sinodal Igreja iha Amerika iha loron 31 fulan Jullu tinan 2002.
Jornalista: Emerenciana Pinto | Editora: Carme Ximenes
