DILI, STLTIMORLESTE.com – Ho espiritu neebe nakonu ho devosaun, sarani Katolika iha area Perumnas, Bairo Pite, Dili, dader nee (29/03/2029) halo prosesaun hodi hanoin hikas Jesus Kristu nia tama ba Jeruzalem. Selebrasaun Domingu Ramos nee sai hanesan portaun hodi tama ba semana santa neebe nakonu ho misteiru fiar nian.
Ritual nee hahu ho bensaun tahan ramos neebe sarani sira foti ba leten hanesan simbolu vitoria. Hafoin bensaun sarani sira tuir prosesaun hodi kanta lian haksolok nian, neebe deskereve fali momentu espiritu (marra aan) husi komunidade ka sarani Perumnas nian hodi lao tuir Jesus nia ain fatin ba iha kruzamentu istoria salvasaun nian.
Iha misa solene laran, sarani sira rona ho silensiu no devosaun ba kbiit husi Jesus nia terus no mate. Maski nakonu selebrasaun nee lao ho dignu no seguru, hodi hatudu unidade espiritual neebe metin entre sarani sira iha area neeba.
Iha omilia Amu Selebrante Daniel fo hanoin ba sarani sira atu laos deit foti ramos nuudar ksolok, maibe mos prepara fuan atu akompanha Jesus iha ninia terus no mate, too ba moris hias iha loron paskua.
Nunee mos sarani Romana da Silva hatete, ba nia importante tebes mak lori bensaun nee ba uma. ”Ami tara ramos ka paliza iha odamatan oin laos deit ba dekorasun, maibe sinal katak Maromak mak ukun ami nia familia, ohin ami haksolok, dader ami kanta Hosana nee kbiit boot ba ami hodi tama ba semana santa,” Romana hatete ho oin midar.
Entretantu selebrasaun Domingu Ramos iha Kapela Rainha da Paz, Perumnas, Bairo Pite, Dili, termina ho dignu, kalma no seguru iha tuku 9 : 49 dader. Sarani sira hahu fila ba uma kain ida idak ho haksolok, hodi prepara aan ba loron tolu sagrada ( Triduu Paskal) neebe sei hahu iha Kinta feira (02/4/2026).
(car)
