DILI, STLTIMORLESTE.com – Madre Maria Antonia de Jesus (FCJM) hatete, agora dadaun tama ona terseiru Domingu adventu, nuudar sarani presiza prepara prezepiu furak iha fuan, hodi simu kosok oan Jesus neebe lori domin no dame ba ema ida-idak, labele tau importante fali ba sosa roupa no sapatu foun hodi ba misa.
“Mensajen natal ba sarani sira hotu iha preparasaun tama ba Natal, agora dadaun ita tama ona terseiru Domingo adventu nian, entaun ita hanesan sarani Katolika, ita laos deit prepara sosa sapatu foun, vistidu foun, pinta fuuk ho koor oin-oin, maibe ita presiza prepara ita nia fuan, ita presiza prepara prezepiu neebe mak furak iha ita nia fuan, atu nai Jesus mai moris ba ita nia fuan nee primeiru liu,” dehan Madre Maria ba jornalista sira iha Ailok Laran, Kinta (18/12/2025).
Nia hatutan, sarani ida-idak prepara fuan, prepara fuan, liu-liu hahalok sira presiza hadia ezemplu durante nee nunka ba misa karik buka hakbesik aan ba misa.
“Molok tama Natal buka hakaas ba misa atu konfesa atu nunee ita selebra Natal ho fuan no laran mos, atu ita prepara prezepiu furak iha ita ida-idak nia fuan atu jesus mai moris ba,” dehan nia.
Madre nee dehan, natal nee Jesus mai moris iha ema nia leet lori domin no dame ba ema ida-idak ba familia, sosiedade, no nasaun, tanba nee husu ba sarani sira presiza prepara fuan, nunee mos ba joven sira karik viajen ba foho kuidadu aan no hemu karik ho naton, nunee iha loron boot Natal bele selebra ho diak iha ida-idak nia familia no parokia no fatin ida-idak.
Nunee mos Madre Leonie Manalu Franciscanae Filiae Santissimae Cordis Jesu et Mariae (FCJM) hatutan, sarani presiza hametin domin tanba Maromak mai lori domin, tanba Jesus Kristu hatudu nia domin boot liu husi moris iha bibi luhan maski nia Maromak liurai boot ida.
“Ita presiza hametin domin iha uma kain ida, domin nee ita haburas husi loron ba loron, oras ba oras, atu hadia liu tan fali ita nia rai doben Timor Leste,” dehan Madre nee.
Madre nee mos husu sarani ida-idak atu kontinua hametin dame iha ida-idak nia familia, sosiedade, no nasaun, nunee bele ho fuan nakonu ho domin hodi simu kosok oan Jesus neebe mai moris iha ema nia leet.
Jornalista: Emerenciana Pinto
Editora: Carme Ximenes
