DILI, STLTIMORLESTE.com – Sarani rihun partisipa iha Misa Funebre Amu Papa Francisco iha Altar Santu Tasi Tolu.
Misa Funebre Sua Santidade Papa Francisco iha Tasi Tolu, Prezide husi Dom Leandro Maria Alves akompanha husi Vigariu Episcopal Asuntu Pastoral Arkedioseze, Amu Guilhermino da Silva inklui Amu lulik sira seluk.
Altar Santu Tasi-Tolu fatin neebé Sua Santidade Papa Francisco prezide misa iha loron 10 Setembru 2024, tanba nee iha Misa Funebre Sua Santidade Papa Francisco halo Tasi-Tolu.
Tuir observasaun STL nian iha Altar Santu Tasi-Tolu iha loron Sabadu (26/04/2025) sarani sira mai tuir misa uza kamizola Amu Papa nian, Sapeo nomos sunbrina, nunee iha oras tuku 4:00 loraik sarani sira nakonu ona iha altar oin, ferik katuas labarik, maske misa nee hahu tuku 06:00 loraik, hein iha neeba hodi akompanha ho orasaun kanta, nunee misa komesa kalan ona, sarani sira sunu lilin hodi akompanha misa nee.
Depois misa sarani barak sena malu lao ain husi Altar Santu Tasi Tolu too iha Rai Kotu, maske sena malu sarani sira la sente kolen, maibe ho haksolok hodi kanta nafatin tuir dalan fila ba uma, balun kolen tur depois kontinua lao, sarani TL hadomi Papa Francisco wainhira rona novidades mate sarani TL sente triste tanba lakon osan mean diak ida Amu Papa Francisco neebe hadomi TL.
Maske ho oras tuku 12:00 kalan, sarani nafatin lao ain fila ba uma, maske balun too ona uma no balun seidauk too uma, tanba balun hela dook.
Tanba nee iha oras tuku 12:00 kalan ona movimentu transporte nomos ema kontinua namas lao.
Iha misa Funebre nee partisipa husi Primeiru Ministru, Kay Xanana Gusmão ho membru governu sira.
Misa Funebre Amu Papa Francisco iha Altar Santu Tasi-Tolu seguransa masimu husi PNTL, F-FDTL, THS THM, selebrasaun misa lao diak too remata.
(joa)
