DILI, STLTIMORLESTE.com – Sarani sira mobiliza ai-funan no Retratu Sua Santidade Papa Francisco husi Prasa Estatua Nain Feto Lesidere ba Altar Tasi-Tolu neebe primeira vez Papa halao misa.
Vigariu Episkopal Asuntu Pastoral Arkedioseze Dili, Padre Jovito Rego de Jesus Araujo dehan, ohin tuku 09:00 sarani sira hamutuk ho Ajénsia Internasional sira, membru Governu, Madre sira, halo ona komboiu lori aifunan Retratu Sua Santidade Papa Francisco nian husi Prasa Estatua Nain Feto Lesidere ba Tasi-tolu, komboiu ho nia route husi Lesidere ba Motael, Nunsiatura Apostólika (sei para minutu ida) hodi omenajen iha Nunciatura Apostolika Farol, kontinua husi Motael ba Palásiu Prezidensiál, Fatuhada, Komoro no too mai Tasi-Tolu.
“Ita hamutuk ho sarani sira organiza hodi lori tiha ai-funan sira nee mai iha Tasi-Tolu, tanba orsida loraik nee tempu laiha ona nee ita lori hotu ai-funan no lori Papa Móvel (Pope Mobile) ho karreta kiik ida neebe uluk Papa pernah sae nee mai tau iha nee, atu nunee orsida ita ninia omenajen ida presta ikus ba Amu Papa nee iha nee,” dehan Padre Jovito ba jornalista sira iha Altar Tasi-Tolu, Dili, Sabadu (26/04/2025).
Nia esplika, iha roma mos depois misa husi Fasilikasaun Pedro nian ba Santa Maria Maior, tanba husi Sarani Katólika Timor nian ohin dader komesa husi Largo Lesidere mai iha Altra Tasi-Tolu.
“Ita nia ohin hahu husi Largo Lesidere too mai iha nee, atu ita mai fo omenajen ikus no taka ho Eukaristia iha fatin ida nee, husu Maromak laran luak ba Amu Papa nian deskansa enternu,” nia informa.
Nia tenik, husi Lesidere ba Motael Nunsiatura Apostolika, tanba Vatikanu ninia prezensa iha Timor nee mak uma ida neeba.
“Ohin ita mai liu husi neeba para oituan tanba Amu Papa deskansa kalan rua iha uma ida neeba, makse la tama uma laran, tanba uma nain laiha, ita para iha liur katak omenajen ita fo nee iha fatin ida neebe deskansa ba, tuir lo-loos halo iha Nunsiatura, tanba nee Vatikanu ninia prezensa iha ita nia rain mak Nunsiatura,” nia deklara.
Iha fatin hanesan, Sarani Katólika Jose Paulo Pinto informa, ohin loron 26 fulan Abril loron neebe sarani no Governu ho Igreja atu presta omenajen ba Papa Francisco nia mate.
“Ita ohin organiza husi Dioseze hodi mobiliza ai-funan, Papa Móvel (Pope Mobile) no Retratu husi Sua Santidade Amu Papa nian husi Prasa Estatua Nain Feto Lesidere ba Tasi-Tolu, tanba Papa halo misa uluk iha fatin Santu ida nee,” nia informa.
Entretantu tuir observasaun jornalista STL iha terenu katak, mobiliza aifunan no Retratu Sua Santidade Papa Francisco husi Largo Lesidere mai Tasi-Tolu hetan seguransa masimu husi Polísia Tranzitu Munisípiu Dili nomos Unidade Espesial Polisia (UEP), Unidade Polísia Martima (UPM) Unidade Polísia Fronteira (UPF) no marka mos Prezensa Primeiru Ministru (PM), Kay Rala Xanana Gusmão nomos Komandante Jeral Polisia Nasional Timor Leste, Komisariu Polisia Henrique da Costa, Komandante Polísia Nasionál Timor Leste (PNTL) Munisípiu Dili, Superintendente Xefe Polísia Orlando Gomes.
(jen)
