DILI, STLTIMORLESTE.com – Sarani Tasi-Tolu halo viasakra ka dalan krus dahuluk tempu kuarezma iha Igreja Nossa Senhora de Gracas iha loron Sesta (20/2/2026).
Viasakra dahuluk nee responsabiliza husi grupu Bairu Jesus Divina Mizerecordiu BTN 3. Hola parte iha viasakra nee maioria husi sarani sira neebe hela iha parte Tasitolu nian.
Tuir Sarani Carla Mendonca dehan, atividade dalan krus nee hodi reflete fali istoria terus Jesus nian iha krus to mate no sakrifisiu Jesus Kristu nian hodi kasu ema hotu nia sala sira.
Tanba nee antes atu tama ba paskoa, dalan kruz baibain halao iha tempu kuaresma, neebe sempre halao iha Sesta feira Santa.
Nia hatutan, nudar sarani katólika iha tempu kuaresma fo tempu hodi tuir dalan krus, hodi fo hanoin fali mai ema katak, Maromak Nia domin bá ema nee bot tebes, hodi haruka Nia Oan Mane Jesus Kristus tun mai hodi fo salvasaun bá ema nia sala, liu husi krus neebe Jesus leba too mate no ikus moris hias fali.
Iha sorin seluk atividade hanesan halao husi Konsellu Diretiva no Funsionario Hospital Nasional Guidu Valadares (HNGV), iha Kapela Nossa Senhora de Lourdes HNGV.
Tuir informasaun neebe STL sita husi pajina rede sosial HNGV katak, atividade ida nee halao atu reflete istoria paixaun, mate no sakrifisiu Jesus Kristu nian hodi kasu ema nia sala sira. Iha kontestu Paskua nian, dalan Kruz baibain halao iha tempu Kuarezma, iha Sesta feira Santa molok vijília paskua nian.
Viasacra nee prezide husi Pe. Dionizio Bere no realiza kada loron Sexta Feira tempo kuarezma oras 12.45 depois de misa diaria iha Kapela Nossa Senhora de Lourdes HNGV.
Marka prezensa iha atividade nee husi Diretora Enfermajem no Parteira HNGV, Funsionario HNGV no Familia Pasiente.
(dom)
