DILI, STLTIMORLESTE.com – Familia matebian idak-idak lori aifunan, lilin ba tau aifunan iha kruz boot semiteriu Kakaulidu, Dili.
Pedronela de Oliveira Nunes hatete, ema neebe la konsege ba too iha idak-idak nian Munisipiu, bele selebra loron matebian iha Dili, no tau deit aifunan no lilin iha kruz boot, tanba ohin loron dia 2 Novembru nee hanesan loron neebe mak importante ou espesial ba matebian sira neebe oras neebe iha ona mundu seluk.
“Tinan-tinan too iha dia 1 too 02 Novembru ita idak-idak ba ita nian knua hodi selebra loron finadu matebian nian ho ita nian familia, maibe ita balun neebe la konsege ba, nee ita bele lori aifunan no lilin ba tau deit iha kruz boot, hodi temi ita nian matebian neebe Nai bolu ona la hamutuk ho ita mundu nee,” dehan nia ba STL hafoin tau aifunan iha kruz boot semiteriu Kakaulidu, Dili, Sabadu nee (02/11/2024).
Pedronela hatutan, selebra loron finadu nee kada tinan dala ida, nee duni ema barak ba idak-idak nian Munisipiu, ohin ba tuir misa iha kapela Surikmas, hotu mak lori aifunan no lilin mai iha kruz boot.
(jac)
