DILI, STLTIMORLESTE.com – Sarani Katolika Timor Leste sente triste lakon ukun nain fiar nian iha mundu rai klaran ida nee, basa Amu Papa koalia direitamente no hatoo Maromak ninia liafuan diak ba ita.
“Ita hotu sente lakon ita ninia ukun fiar nian iha mundu rai klaran, ita sente lakon ema ida neebé too iha ita nia fatin hodi koalia direitamente ho ita, hatoo direitamente Maromak ninia liafuan diak ba ita no lori mundu mai, tau matan haree ba ita iha Timor,” hatete Amu Paroku Imaculada Conceição da Virgem Santa Maria, Padre Paulus Maya liu husi omilia wainhira prezide misa Requiem ba Sua Santidade Papa Francisco iha Igreja Katedral Dili, Tersa kalan (22/04/2025).
Pe. Paulus hatete, Papa Francisco ema ida neebé iha espiritu boot tebes-tebes, nia hadomi ema kiak sira, nia hadomi ema sira moris iha dalan ninin, hadomi ema moras sira, hadomi ema sira neebe abandonadu, hadomi imigrante sira no hadomi natureza.
Amu esplika, sarani ba konfensa dehan sala hasoru Maromak sala hasoru maluk sira, sala hasoru natureza, soe foer arbiru tesi ai arbiru nee pekadu tenke konfesa, laos sente dehan ida nee laos pekadu.
Amu Papa ema ida neebé moris duni evanjelhu nia hanorin, hodi haklaken lo-loos evanjelhu ida nee, Amu Papa ida neebe iis bibi nian, nia haruka ema bibi atan diak tenke iis bibi nia, nia hadomi ema kiak sira, ema moras oin-oin, la hakribi, nia hakbesik ba ema hotu-hotu, labarik kiik, ema boot ferik katuas, se deit nia hakbesik ba, nia nakloke ba mundu ba ema hotu hotu, ita mesak maun ho alin laiha deferensia maibe hanesan maun alin tanba ita iha aman ida deit mak Maromak.
Amu Papa Francisco mos husu ba igreja atu nakloke ba ema hotu-hotu fo espasu ba ema hotu bele tama iha igreja, la interese nia se simu ema hotu iha igreja.
Partisipa iha misa Requiem ba Sua Santidade Papa Francisco husi Membru Governu, PRT, eis Prezidente Republika Francisco Guterres Lou Olo, madre no sarani sira, iha misa igreja laran nakonu nomos resintu igreja nian, misa nee sarani balun hamonu maten wen.
(joa)
