BAUKAU, STLTIMORLESTE.com – Segundu Sarjentu Sojue de Araujo husi Komponente Forsa Terrestre neebe hakotu iis iha Hospital Rejional Eduardo Ximenes (HoREX) Baukau, tanba hetan atake moras Hemorajia Serebral.
Medika Jeral Servisu Sala Emerjensia HoREX, Bazilia dos Santos Freitas haktuir, tuir informasaun neebe HoREX rekolha husi parte familia matebian, matebian Sojeu monu iha haris fatin iha baze Komponente Forsa Terrestre Lanud Baukau.
Matebian Sejou monu pur volta tuku 05:00 loraik, bainhira matebian nia kolega ida ba hariis fatin derepente hetan matebian monu hela fatin refere, hafoin halo kontaktu parte ambulansia HoREX hodi evakua ba hospital iha tuku 08:20 kalan.
Durante matebian too iha HoREX kondisaun iis sei iha, nunee mediku sira esforsu makaas maibe la konsege salva, tanba bainhira evakua matebian too iha hospital ho kondisaun grave, nunee matebian hakotu iis iha tuku 11:10 kalan.
“Tuir diagnostiku internisiadu neebe doutor espesialista dehan nia (matebian Sojeu) hetan atake moras Hemorajia Serebral iha ninia kakutak,” hateten Medika Jeral Bazilia ba jornalista sira iha HoREX Baukau, Sesta (27/06/2025).
Medika nee sublina, durante halo diagnostiku ba matebian laiha problema saude seluk, maibe afeta deit mak moras Hemorajia Serebral.
Bazilia argumenta, posibilidade bele salva matebian nia vida iha tempu tratamentu maibe la konsege, tanba too tarde iha hospital.
“Sira lori mai mak tarde, tanba nia monu iha jam 05, maibe lori mai too jam 08:20, entaun dutante oras tolu nia laran iha deit haris fatin, maibe lalais karik bele salva,” Bazilia fundamenta.
Diretor Klinika HoREX, Mouzinho Francisco akresenta, mezmu mediku espesialista sira halo esforsu makaas maibe labele salva, tanba moras refere afeta makaas iha matebian nia kakutak neebe ho pursentu kiik atu salva.
“Moras nee makaas iha nia kakutak ho pursentu kiik atu salva depende ba diagnostiku iha kakutak nee mak perdarahan oituan,” hateten Mouzinho.
Tuir Diretor nee katak, deskonfia matebian iha sofre kondisaun saude seluk, hanesan la kontrola tensaun, raan midar, fuma no hemu alkolika sira neebe bele afeta mos ba matebian nian saude.
Entretantu tuir informasaun neebe STL asesu husi pajina Komponente Forsa Terrestre katak, Segundu Sarjentu Sojue de Araujo Neves hahu inkorpora vida militar iha loron 22 Julhu 2009 ho postu soldadu no promove ba postu Cabo iha tinan 2019 neebe iha tinan 2024 kontinua promove ba segundu Sarjentu.
Sojue moris iha Atauro loron 15 Outobru 1983 no hakotu iis iha loron 27 Junhu 2025, pur-volta tuku 11:00 kalan iha HOREX Baukau, hodi husik hela feen no oan nain tolu kompostu mane ida no feto rua.
Hafoin matebian hakotu iis iha HoREX parte Komponente Forsa Terrestre evakua kedas nia mate isin ba iha baze Lanud Baukau hodi hein desizaun husi familia no Instituisaun FALINTIL-Forsa Defeza Timor Leste.
(tom)
