DILI, STLTIMORLESTE.com – Polisia Nasional Timor Leste (PNTL) liu husi Diresaun Investigasaun Kriminal Nasional (DIKN) deteta kontentor balu ho sasan ilegal tama iha Portu Tibar.
Diretór Diresaun Servisu Investigasaun Kriminál (DSIK), Superintendente Polisia, João Belo dos Reis hatete, Autoridade Aduanera identifika kontentor ho sasan ilegal tama iha portu Tibar.Tanba nee Autoridade Aduanera liga imediata ba Polisia Nasional Timor-Leste (PNTL) liu husi DIKN halo kedas intervensaun ba sasan ilegal iha 8/8/2025, Autoridade Aduanera no DIKN halo operasaun ba kontentor neebe tama iha portu Tibar no Autoridade Aduanera deteta kontentor nee sasan ilegal ho sigaru Marlboro karton hamutuk 912.
“Iha sesta lokraik Diresaun Investigasaun Kriminal Nasional asegura kedas kontentor nee mai iha Komando Jeral PNTL, no ami identifika iha kontentor laran sigaru Marlboro hamutuk karton 912 mak iha kontentor laran,”dehan Superintendente Polisia, João ba jornalista sira, iha Kuartel Jeral PNTL, Dili, Segunda (11/08/2025).
Tuir nia desde inisiu kontentor nee hatama sasan hahan fehuk ropa sona, maibe hafoin Autoridade Aduanera deteta kontentor laos tula fehuk ropa maibe sigaru Marlboro Karton 912 mak iha kontentor laran.
Nunee Diresaun Investigasaun Kriminal Nasional foti kedas medida no halo investigasaun, no tau ona numeru nuk 0255/2025 PNSIK no evidensia sira nee sira sei submete ba Ministeriu Publiku (MP).
Maibe evidensia sira nee sei iha DSIK no auto notisia sei aprezenta ba MP, tanba nain ba sasan Autoridade Seguransa identifika ona suspeitu ho inisial AC neebe DSIK halo intervensaun ba nia.
“Ami konsidera autor nuudar fasilitador ba sasan Ilegal nee ami sei entrega ba MP tanba fasilitador nee sidadaun Timoroan. Tanba nee ami nafatin koordena ho Autoridade Aduanera, bainhira saida deit mak tama iha portu entrada mak fora husi sasan neebe legal mak sira informa mai ami, ami sei foti medida imediata,” dehan nia.
Entertatu Polisia Nasional Timor Leste (PNTL) kaptura ona sidadau ho inisial AC neebe hatama sigaru Marlboro Karton 912, tanba nee PNTL husu sidadaun hotu-hotu tenke kumpri lei sira neebe iha atu nunee labele difikulta sira nia negosiu.
(jen)
