BAUKAU, STLTIMORLESTE.com – Hahu Janeiru too agora Servisu Saude Autoridade Munisípiu Baukau (SSAMB) rejistu kazu moras dengue hamutuk 124, husi numeru nee laiha ida mak lakon vida.
“Husi total 124 nee ami identifika iha HoREX iha Sentru Saude no Postu Saude bazeia ba diagnosa laiha ida mate, sira nee rekuperadu hotu ona,” hatete Diretor Servisu Saude Autoridade Munisípiu Baukau (SSAMB), Cristiano Cipriano Belo ba STL iha Salaun HoREX Baucau, Kinta (21/11/2024).
Nia dehan, uluk kazu sira hanesan nee konsentra deit iha Baukau Vila, maibe ikus-ikus nee kazu neebe espalha iha Postu Administrativu sira iha ona, iha Baukau la iha kazu mate ba dengue.
“Ita nia aimoruk ida rega susuk nee iha hela, iha mos aimoruk ida tau abate atu susuk nia tolun labele naklekar. Ita nia aimoruk ida halo fomingasaun nee ladun efetivu, ita kuandu halo fomingasaun susuk sira neebe seluk subar aan nee sei la hetan, no sei la mate iha tempu nee, tanba sira sei semo dook,” nia esplika.
Nia informa, aimoruk neebe efetivu diak liu mak aimoruk ida tau ba bee moos nee, tau mos iha vazu, tanki haris fatin no bee neebe nalihun sira nee.
Iha fatin hanesan, Reprezentante Prezidente Munisipiu Baukau, Maria Celestina Veigas dehan, sira sempre fo hatene ba Autoridade Lokal sira atu fo avizu beibeik ba Komunidade tenke limpeza iha idak-idak nia uma oin, atu nunee prevene ba moras dengue, tanba agora tempu udan monu rai.
Nia hatutan, sempre fo avizu ba autoridade lokal sira atu fo hanoin beibeik ba Komunidade sira para idak-idak hamoos ambiente, nunee bele halo prevensaun ba moras dengue.
(jen)
