DILI, STLTIMORLESTE.com – Dezenvolvimentu balun lao ona, maibe kona-ba saude nafatin sai preokupasaun iha publiku.
Tuir Visi Diretor Hak, Antonino de limas ba jornalista STL iha nia knaar fatin Farol, Kinta (28/08/2025) hatete, atividade konaba konstrusaun estrada nomos setor agrikultura oras nee lao, maibe konaba saude nafatin sai preokupasaun tanba iha klinika no hospital atendementu lao ladiak, nomos aimoruk laiha ida nee mak sai problema.
“Observasaun jeral deit buat neebe ita haree mak ba assuntu estrada, ita haree lao duni atividade projetu lao iha setor agrikultor. Konstrusaun agrikultura buat barak lao, maibe sira seluk nafatin kritiku liu-liu ba assuntu saude, tinan kotuk kedas too agora nafatin konaba atendementu iha Hospital ladun ladiak, no aimoruk sai preokupasaun publiku, nomos iha Ministeriu Saude ita laharee planu nee adekuadu,” dehan nia.
Nia hatete, kona-ba saude oras nee publiku nafatin preokupa tanba laiha aimoruk no atendementu ladiak ba komunidade sira, ida nee sai preokupasaun boot.
Nia hatete, iha kapital Dili loke tan estrada foun fo afeita ba komunidade sira, liu husi eviksaun, maibe governu rasik la kumpre lei neebe mak establese la kria kondisaun bainhira muda komunidade.
(eme)
