DILI, STLTIMORLESTE.com – Mate isin Saudozu Antônio da Silva Soares “Maukalo” funebre ona iha Jardim dos Herois Metinaru, Xefe Estadu Maior Jeneral F-FDTL, Tenente Jeneral Domingos Raul Falur Rate Laek hatete, Suadozu Maukalo nia espiritu nafatin guia instituisaun nee.
Nia dehan, Irmaun Maukalo fizikamente nia laiha ona, maibe nia espíritu sei guia forsa militar iha instituisaun F-FDTL nian.
“Nia prezensa fiziku bele laiha, maibe nia espíritu moris nafatin, nia legadu kontinua inspira ita, ninia memoria sira kontinua fo kmaan mai ita, adeus Kompanheiru, Kompatriota no maun alin, hein katak ita boot kontente ona hasoru malu fali ho oan doben sira no feen kaben, nomos soldadu sira neebe monu iha kampu batalha iha mundu seluk,” dehan nia liu husi diskursu iha serimonia funebre Saudozu Maukalo iha Jardim dos Herois Metinaru, Dili, Tersa (22/10/2024).
Nia akresenta, Saudozu keta haluha atu proteje no tau matan mos ba sira neebe sei iha nee.
“Ohin ita halibur malu iha nee atu fo onra ba personalidade neebe laos deit membru FALINTIL no F-FDTL neebe durante nia vida serví ho fuan no klamar, fó totalmente nia aan ba luta libertasaun nasional, ita hanoin hikas Komandante ida, mane ida neebe dedika nia moris hodi serví patria, neebe sei grava ba nafatin iha ita idak-idak nia fuan,” katak nia.
Nia dehan, Irmaun Maukalo ema ida ho laran luak estraordinariu, dedikasaun no kompaixaun neebe laiha limite, ninia vida moris sai sasin ida ba valor sira, komportamentu no reflesaun kona-ba ninia karakter, ninia legadu, no ba ninia espíritu de luta.
Nia dehan, siklu moris ema nian remata ho nia iis ikus, maibe memoria neebe nia harii iha nia moris tomak sei moris nafatin no sei kuda ho sira neebe nia hasoru, sira neebe nia moris hamutuk, liu liu sira neebe nia hadomi.
‘Kompatriota no kamarada Maukalo, iha nia moris tomak, kria legadu ida neebe bainhira fo sai notisia kona-ba nia mate, kamarada sosiedade tomak, komunidade veteranu no instituisaun neebe nia ajuda harii sente lakon oan mane husi Rai Doben neebe dedika nia vida tomak, husi idade kiik, hodi defende luta no harii too nia loron ikus,” dehan nia.
Nia informa, Saudozu Maukalo nuudar militar ida neebe barani, servisu nain durante tempu difisil no kontribui makaas ba dezenvolvimentu instituisaun F-FDTL. Irmaun Maukalo, patriota, nasionalista, eroi nasional neebe moris tuir prinsipiu no valor justisa, fraternidade no respeitu ba ema seluk, aleinde nuudar funu nain, aman iha familia no ofisial superior F-FDTL nian, husik hela legadu ida neebe labele haluha ba jerasaun futuru sira transmite no fahe nuudar sidadaun neebe iha konsiensia, ezemplu transmite, simplisidade, disiplina no lealdade ba Estadu, fiel ba povu no ba patria.
Enkuantu Reprezentante Família Saudozu Maukalo, Bilou Mali agradese ba parte hotu nia esforsu ba Saudozu hahu husi ba tratamentu too hakotu iis hodi halo transaladasaun mate isin mai Timor Leste too fúnebre.
Partisipa iha serimonia funebre ikus marka prezensa husi Eis Prezidente Republika, Francisco Guterres Lú Olo, Eis Primeiru Ministru, Taur Matan Ruak, Jeneral Reformadu, Lere Anan Timur, Familia veteranu, familia instituisaun F-FDTL no entidades hotu.
(mar)
