BAUKAU, STLTIMORLESTE.com – Saun Jose mak sai ezemplu ba laen kaben sira hodi kuida feen kaben no hametin relasaun domin uma kain nian iha moris familia.
Liu husi homilia iha misa solene ba selebra aniversariu padrueru Dioseze Baukau, Bispu Dioseze Baukau, Dom Leandro Maria Alves hateten, Saun Jose nuudar interpesoal iha Maromak nian futar oin ho prezente fiar, fidelidade no responsabilidade obedensia neebe iha evanjelista sira la koalia barak kona-ba Saun Jose, maibe iha deit evanjelista Saun Mateus no Saun Lukas mak koalia oituan kona-ba Saun Jose neebe bolu Saun Jose ema justu boot ida relasaun ho Maromak, tanba rona no halo tuir Maromak nia hakarak.
Tanba justu hanesan Maromak nia ema hodi simu Maria ho laran tomak, kuida Maria justu moris nian iha liafuan, badinas servisu hodi sustenta Maria hanesan laen kaben tuir Maromak nia hakarak.
Nunee Saun Jose sai ezemplu ba laen kaben sira hotu hodi banati tuir hahalok domin hanesan aman ou laen kaben fiel ba Maria.
“Saun Jose hatudu ezemplu iha familia importante mak fidelidade, feen laen buka fiel ba malu, agora tau kestaun ba ida nee, fiar malu iha familia pureza fidelidade nian hodi kompleta malu, hodi harahun ita nia fidelidade ba malu,” hateten Dom Leandro iha homilia misa Solenidade Saun Jose neebe selebra iha Igreja Katedral Santu Antonio, Vila Antiga, Baukau, Kuarta (19/03/2025).
Bispu Dioseze Baukau nee konsidera, Saun Jose sai ezemplu ba laen kaben sira hotu hodi banati tuir hahalok domin nian hanesan aman ou laen kaben, neebe fiel ba Maria no la lori atu sai ema loos ou verdadeiru no konfiaves.
Doutrina Igreja nian hanorin Saun Jose mak Jesus Kristu nia Aman hakiak, nuudar titulu ida neebe boot liu ona no la haraik ba mane sira iha mundu, maibe iha deit Saun Jose no titulu neebe Maromak fo ba Saun Jose, tanba konfiansa hodi entrega Maria ho Oan Mane Jesus Kristu ba Saun Jose atu kuida tuir promesa neebe revela ona husi David liu husi profeta Izaias katak, feto raan ida sei kous neebe ema hanaran Emanuel.
Iha evanjelhu Saun Mateus hatoo Maromak liu husi Anju hateten ba Saun Jose, keta tauk simu Maria sai nuudar feen kaben, basa Maria sei kous Espiritu Santu neebe fo naran Jesus Kristu, nunee Saun Jose rona no firme simu ordem Maromak nian simu Maria iha obedensia tuir Maromak nia hakarak.
“Saun Jose hanorin ita rona no halo tuir, rona malu nee importante, maibe ita la rona malu buat hotu sai rungu ranga, la rona malu nee susar atu halo tuir, bele lakon buat hotu no ba ema sira neebe mak Maromak tau mai ita nia liman atu kuida,” hateten Dom Leandro
Nia husu, nuudar sarani presiza rona malu no lao tuir orientasaun moris uma kain nian, tanba la rona malu iha impaktu no bele lakon ema neebe Maromak haraik ba ita atu kuida, nunee la presiza sai importante hanesan ema importante, maibe importante mak moris tuir Maromak nia hakarak.
Tanba nee moris presiza haraik aan, hametin unidade neebe Saun Jose jerasaun husi Liurai David la loko aan, servisu ho liman rasik hodi moris ba nia familia.
“Iha tempu kuarezma nee bolu atensaun ba familia atu iha konsiensia ba moris importante familia nian nuudar Igreja Domestika, husu ba inan aman sira tau matan ba oan sira, hanorin oan sira moris tuir Doutrina Igreja nian,” Dom Leandro sujere.
Selebrasaun misa solenidade Saun Jose, Bispu Diozese Baukau husu ba familia sira atu kuida no tau matan ba membru familia sira hodi moris tuir Doutrina Igreja nian, tanba familia mak elementu fundamental iha sosiedade no Igreja inklui parte santidade Igreja nian.
(tom)
