DILI, STLTIMORLESTE.com – Sekretariu Estadu Arte no Kultura (SEAK) Jorge Soares Cristovão, konvida Prezidente Republika (PR) Jose Ramos Horta atu abertura Pavillaun Timor Leste iha Biennale Venezia.
Bainhira remata hasoru malu, Sekretariu Estadu Arte no Kultura (SEAK) Jorge Soares Cristovão ba jornalista iha Palasiu Prezidensial Nicolau Lobato, Bairru Pite, Dili, Segunda (16/02/2026) hatete, hasoru Prezidente Republika hodi konvida abertura Pavillaun Timor Leste iha Biennale Venezia.
“Enkontru ida ho sua exelensia Prezidente mai ho objetivu atu konvida Prezidente hodi bele halo abertura ba ita nia Pavillaun Iha Biennale Venezia koalia ona ho Prezidente no Prezidente komfirma katak sei hola parte hodi halo abertura direita bai ta nia expozisaun 2026 neebe mak sei halo abertura iha dia 7 ba Pavillaun Timor Leste nia,” dehan nia.
Sekretariu Estadu dehan sei halao abertura iha dia 7 maiu, no iha tinan 2024 Timor Leste partisipa ona expozisaun arte kondekorasaun ida neebe mak boot tebes iha mundu iha 2024 pavilaun Timor Leste nia hetan partisipasaun husi vizitante sira mais ou menus 25 mill.
“Objetivu prinsipal mak atu promove ita nia identidade, promove ita nia kultura Timor nia agora mos hodi nafatin iha expozisaun ida nee,” katak nia.
Iha audiensia nee, Prezidente simu ofisialmente konvite atu viajen ba Italia hodi prezide abertura boot pavillaun Timor-Leste nian. Xefe Estadu espreza ninia apoiu ba inisiativa nee, hodi nota importansia reprezenta nasaun iha ida husi forum arte kontemporanea signifikativu liu iha mundu.
Jorge Cristovão fo sai informasaun ba Prezidente konaba kuradoria espozisaun nian, neebe ho objetivu atu promove identidade Timor nian no lian materna sira iha palku global. Bazeia ba susesu iha tinan sira liuba, neebe atrai vizitante internasional hamutuk nain 25.000 resin, pavillaun tinan nee nian sei hatudu fuzaun uniku entre arte tradisional no modernu. Espozisaun nee aprezenta Tais sagradu no dadolin (poezia rítmika), hodi foka ba obra husi soru nain-tais Maria Verônica, hamutuk ho kontribuisaun inovador husi artista foin-sae Timor sira, Edson Caminha no Juventino Pereira.
Prezidente Ramos-Horta enfatiza katak prezensa Timor-Leste iha Biennale nuudar oportunidade vital ida hodi fahe nasaun nia istoria riku no konsiensia ambiental ho audiensia global. Hodi integra tradisaun beiala sira ho sinematografia no arte kontemporanea, Prezidente nota katak pavillaun nee sai hanesan ponte entre jerasaun sira, hodi hatudu reziliensia kriador povu Timor nian no sira-nia kompromisu ba prezervasaun kultural iha sekulu XXI.
(eme)
