DILI, STLTIMORLESTE.com – Delegasaun SEAMEO halo vizita kortezia ba iha Ministeriu Edukasaun (ME), hodi koalia kona-ba sei halo teste ba estudantes quinto ano ensinu baziku.
“Ohin dader vizita kortezia ida husi Diretora Organizasaun Ministeriu Edukasaun Sudeste Aziatiku mai iha nee, aban dader ita sei lansa programa ida netrika de aprendizajen bazika sudeste aziatiku nian, neebe mak sira sei halo teste ba estudante sira quinto ano ensinu baziku, teste nee sei halao iha loron hira nia laran, depois informasaun nee husi organizasaun SEAMEO mak sei dokumenta, nunee mos sei fo mai hatene fali TL, nee ita hola parte ho nasaun sira sudeste aziatiku nian, primeira vez TL hola parte, ita hein katak, informasaun nee sei fo sai mai ita oinsa mak ita bele hadia diak liu tan no hasae kualidade iha ita nian rai,” afirma Ministra Edukasaun (ME), Dulce de Jesus Soares ba jornalista sira iha sala VIP ME, Segunda nee (28/10/2024).
ME Dulce dehan, atu haree aprendizajen labarik ida nian laos deit ME nian responsabilidade, maibe informasaun nee baze ba mos ministeriu relevantes sira seluk, maibe ba ME importante tebes atu haree fila-fali ba iha kurrikulu, kualidade professores, nunee mos jestaun eskolar sira nomos infraestrutura, ME kontenti tebes-tebes bele hola parte iha programa ida neebe mak hetan apoiu boot husi UNICEF hanesan parseiru ME iha tempu naruk ona, sira mak ajensia neebe durante nee fo apoiu ba ME.
Iha fatin hanesan Diretor SEAMEO Sekretariat, Datuk Dr Habibah Abdul Rahim hatete, Organizasaun Ministeriu Edukasaun Sudeste Aziatiku nian atu fo apersiasaun ME hola parte ba iha avaliasaun aprendizajen ida nee.
“Ida nee hanesan kooperasaun neebe mak diak atu dezenvolve estudantes sira nian liga ho literasia no matematika, nunee mos sekretariat SEAMEO nian sei suporta ME atu bele haree fila fali oinsa rezultadu husi avaliasaun ida nee bele suporta ba iha planiamentu, bele haree mos kualidade liga ho ensinu aprendizajen,” nia komenta.
Nunee mos Deputy Rep Of UNICEF Timor Leste, Ainhoa Jaureguibeitia dehan, primeiru UNICEF agradese ba ME neebe hola parte iha avaliasaun primeiru ida nee, ida nee hanesan oportunidade diak ida hanesan baze ida hodi bele hatene situasaun iha neebe, oinsa mak bele responde ba ida nee.
(jac)
