AMBENO, STLTIMORLESTE.com – Sekretariu Estadu ba Autoridade Protesaun Civil (SEAPC), Domingos Mariano Reis ajuda fos marka governu no World Food Programme (WFP) ho todan 25 kg, hamutuk 500 sakas ba vulneravel dezastre iha RAEOA.
Simbolikamente fos refere entrega ba Prezidente Autoridade (PA-RAEOA) Regio da Cruz Salu. Alende ajuda fos, prezensa SEAPC iha neeba, hodi halo linha koordenasaun atu halao aniversariu dezastre iha RAEOA, dia 13 de Outobru 2025.
SEAPC Domingos Mariano Reis hamutuk ho Komisariu Komisaun Funsaun Publiku (KFP), Jose Telo Soares Cristovao, Komandante Interinu PNTL RAEOA Superintendente Asistente Polisia (SAP), Angelo Quelo no PA-RAEOA Regio da Cruz Salu, no xefe suku 20 iha RAEOA, oferese fos 500 sakas ba komunidade vulneravel dezastre iha RAEOA. Serimonia oferese fos 500 sakas nee, halao iha Sede Suku Bobocase, Bairo Bihala, Segunda (8/9/2025).
Alende ajuda fos, SEAPC) Domingos Mariano Reis hatoo pedidu adisional ida ba PA-RAEOA. Iha pedidu nee, husu PA-RAEOA atu oferese rai ida ba Autoridade Protesaun Sivil (APC) iha Oecusse, para uza hodi konstrui armajen ida iha neeba. Funsaun armajen nee hodi prepara stok aihan ba RAEOA. Bainhira akontese dezastre ruma, iha 24 oras nia laran, bele responde imediatamente.
Preokupasaun seluk, konaba edifisiu APC iha Oecusse. Iha enkontru parte rua konkorda. PA-RAEOA sei hatudu fatin ida hodi konstrui edifisiu ba Komandante APC Joao da Silva Sila ho nia ekipa, hodi estabele sira nia gabinete no bombeirus hodi halo serbisu.
“Agradese hatoo ba PA-RAEOA ninia komitmentu no kontribuisaun ba APC, atu garante sustentabilidade APC iha RAEOA,” hatete SEAPC Domingos Mariano Reis.
PA-RAEOA, Regio da Cruz Salu hatete, nuudar area enclave, lakoalia deit merkadu maibe mos koalia atuasaun hodi asegura rezilensia rai no povu. Ida nee, presiza refleta iha asaun hodi hafanu nafatin governu.
Segunda horseik udan tun ona. Kulturamente, iha Oecusse, kuandu udan mai iha fulan Setembru, iha ona posibilidade ba komunidade Oecusse, ba toos nain sira, atu kuda sira nia fini batar neebe sira prepara ona. Nomos kuda aihan sira seluk ba sira nia toos.
Konaba vulneravel dezastra, SEAPC Domingos Mariano Reis hatete, xefe aldea no xefe suku sira fo dadus. Parte SEAPC fo deit asistensia. Tanba nee SEAPC rekomenda ba xefe aldea no xefe suku sira, presiza fo dadus neebe los, tanba sira mak hatene lolos, sira nia komunidade (uma kain) nain hira mak kona dezastra. Kuandu komunidade iha aldea no suku laiha aihan ka menus aihan, autoridade suku sira mak hatene no fo dadus kompletu, para hetan ajuda.
Fos neebe SEAPC ajuda, labele lori ba faan fali iha merkadu, uza ba lia oioin. Maibe uza hodi responde komunidade neebe vulneravel ba sira nia nesesidade. Tanba nee, nia husu ba autoridade lokal no entidades hotu-hotu atu kontrola ida nee.
Iha biban hanesan PA-RAEOA, Regio da Cruz Salu husu ba xefe suku sira atu sai autor ba baze informasaun konaba dezastre. Sira mak hatene dezastre saida deit mak akontese iha sira nia aldea no suku laran.
Jornalista: Joseph Koa
Editor: Gaudensiu Mau
