DILI, STLTIMORLESTE.com – Sekretáriu Estadu Asuntu Toponomia no Organizasaun Urbana (SEATOU) la prende roo sira iha kampung Alor ho Markoni, maibe foti ba tau iha Bebonuk no Bidau Santana, tanba roo sira nee para iha tasi ibun hanesan gafanotu.
“Hau hanoin SEATOU la prende sira nia roo, ami seidauk foti roo ida ba ami nia uma ka ami nia office, obriga sira lori roo sira nee ba tau iha fatin rua, ida iha Bebonuk no ida iha Bidau Santana, hotu-hotu ba tau iha neeba para sidade nee ita haree organizadu husi vero sira nee, ita nia bero sira para hanesan gafanotu, sira para iha tasi laran neebe SEATOU la prende vero, ami atu lori bero nee ba tau iha nee,” hatete Sekretariu Estadu Asuntu Toponomía no Organizasaun Urbana (SEATOU), Germano Santa Brites ba STL iha PN, Kuarta (13/11/2024).
Tanba tuir nia, bero oan sira neebe mak faan ikan iha tasi ibun SEATOU la prende ida, maibe origa sira lori roo ba tau iha fatin rua hanesan Bebonuk no Bidau Santaana. SEATOU ho ekipa haruka muda deit hodi ba konsentra hamutuk iha fatin neeba, labele dun fali ekipa mak halo aat.
Antes nee Gilbero Vilanova nuudar Peskador esplika, peskador sira nee durante halo sira nia servisu iha tasi ibun kampung Alor ho Markoni la satisfaz ho hahalok husi SEATOU neebe mak ba hapara sira nia atividade besik semana rua ona.
Nia nuudar peskador ladun santisfaz ho hahalok SEATOU nia kona-ba mai hapara sira nia atividade, agora loron neebe Governu fo sai nee 8 too 11 Setembru.
“Agora SEATOU mai hapara ami peskador nia atividade nee iha kedas iha loron 26 de Agostu too fali ohin loron, ho ida nee ami ladun satisfaz, depois sira la iha avizu ida ba ami katak iha loron ida nee imi hapara imi nia atividade nee ho razaun katak Amu Papa atu mai, ” nia informa.
Nunee mos, Peskador Laka Muhamud triste ho atuasaun neebe halo husi SEATOU ho ekipa hapara sira nia atividade.
“Maibe ami mos komprende tanba vizita Amu Papa mai entaun mai koalia ho didiak, dehan imi tenke foti imi nia bero tau ses lai tanba Amu Papa sei mai liu husi nee, ita atu hamoos ita nia nia ambiente no fatin nee,” nia deklara.
(jen)
