DILI, STLTIMORLESTE.com – Iha tempu badak Sekretariu Estadu Asuntu Toponomia Organizasaun Urbana (SEATOU) sei aprezenta relatoriu kona-ba baku malu entre Negosiante ho Ekipa SEATOU iha Kampung Baru ba Presidente Republika, José Ramos Horta hodi haree.
Sekretariu Estadu Asuntu Toponomia Organizasaun Urbana (SEATOU), Germano Santa Brites dehan, Prezidente Republika, Jose Ramos Horta nia lamentasaun ba SEATOU nia atuasaun iha Kampung Baru ba vendadores sira nee, Prezidente Republika bele koalia laiha problema.
“Maibe diak liu tenke akompanha situasan ida hahu mai nee too baku malu, atu nunee segementu sira ita halo nee labele dun deit SEATOU mak sala, tanba nee hau halo ona nia relatoriu tanba Prezidente Republika husu ona, no SEATOU sei aprezenta relatoriu akontesimentu primeiru no segunda nee ba Prezidente Republika,” hatete SEATOU, Germano ba jornalista sira iha PN, Dili, Sesta (08/11/2024).
Nia esplika, dadus akontesimentu entre Ekipa SEATOU nee kompletu ona, hein Ministru Administrasaun Estatál, Tomás do Rosário Cabral entrega ba Permeiru Ministru, Kay Rala Xanana Gusmão lori hodi aprezenta iha Prezidente Republika.
“Prezidente Republika Nia hanoin katak, SEATOU tenke rezigna aan, SEATOU tenke komarka, nee Prezidente Republika nia hanoin mos diak hotu, lori hau ba komarka mos dever Prezidente Republika nian, importante hau la halo korrupsaun, hau la naok osan povu nian depois lori hau ba komarka, sei hau hamoos sidade no servisu ba rai ida nee, ekipa sira halo servisu hodi sidade Dili furak iha ema hotu nia matan nee hau senti diak hela,” nia informa.
Iha fatin ketak, Negosiante Kampung Baru, Carlito Ximenes hatete, SEATOU uza brutalizmu hasoru vendedores, tanba sira salva nia sasan mak hetan baku.
“Ami faan nee kalan mak faan iha nee, maibe iha mumentu neeba, sira mai atu foti hotu ami nia produtu neebe ami faan mak ami salva ami nia sasan, entaun ami baku malu, maibe ami hakarak kazu nee levanta ba PR no PM, atu nunee sira tetu took hahalok sira hanesan nee diak ba povu ou lae,” nia afirma.
(gui)
