BAUKAU, STLTIMORLESTE.com – Sekretariu Estadu Asuntu Toponimia Organizasaun Urbana (SEATOU) liu husi Diresaun Jeral Toponimia no Organizasaun Urbana sosializa dekretu lei 2 ba lider komunitariu sira iha Postu Administrativu Vemasi, Munisipiu Baukau.
Diretor Nasional Ijiene Ordem no Publikas, Egas Jose Caetano esplika, sosializa refere bazeia ba pedidu husi Autoridade Postu ba SEATOU hodi fo hanoin ba lideransa komunitariu sira, lalaok implementasaun dekretu lei nu 33/2008 27 Agostu kona-ba ijiene no ordem publiku neebe altera ba dekretu lei nu 3/2024 17 Janeiru no dekretu lei nu 31/2017 neebe altera husi dekretu lei nu 51/2016 sobre lisensiamentu mensajen publisidade.
“Objetivu husi sosializasaun ba komunidade sira bele hatene konteudu husi dekretu lei 2 hau temi nee SEATOU baibain utiliza dekretu lei nee organiza sidade urbana iha Timor laran tomak,” hateten Egas Jose Caetano ba jornalista sira iha Vemasi, Kuarta (23/10/2024).
Nia sublina, dekretu lei 2 refere mak baze ba SEATOU hodi organiza sidade urbana sira hahu ona iha sidade urbana Dilli no sei too nivel postu no suku neebe kategoria urbana.
Aleinde mos bandu komunidade loke negosiu iha trotoar leten, husik animal hakiak livre iha dalan publiku, soe lixu arbiru iha dalan publiku no mos halo barulhu liu tuku 09:00 tempu kalan.
Nia deklara, bainhira sidadaun sira kontra regras neebe estabelese ona iha dekretu lei 2 refere, sei aplika multa husi US$ 5.00 too US$ 50.00 no US$ 10.00 too US$ 100.00 depende ba kategoria kontra.
Diretor nee husu Lideransa Komunitariu sira atu hatutan ba komunidade sira liu-liu iha Sidade Urbana Vemasi atu hatene konteudu lei refere hodi hatene, tanba daudaun nia implementasaun hahu ona iha nivel territoral.
Iha fatin hanesan, Administradora Postu Administrativu Vemasi, Elda Maria Viegas de Sousa Freitas hateten, objetivu konvida ekipa SEATOU sosializa dekretu lei 2 refere iha Vemasi hakarak fo hanoin ba Lider Komunitariu sira hodi desimina tutan ba komunidade sira, tanba dadaun iha Postu Vemasi, liu-liu Suku Vemasi komunidade sira kontinua okupa espasu publiku.
“Hanesan Autoridade Lokal hakarak tebes informasaun hirak nee too iha Lider Komunitariu, tanba ita hakarak tebes atu haforsa lei hirak neebe mak iha tiha ona,” dehan Elda.
Autoridade Postu nee mos apresia ho dekretu lei 2 refere no tenke organiza Postu Vemasi tuir dekretu lei lei nu 3/2024, tanba komunidade kontinua halo uma lisan besik iha mota ninin, besik liu estrada publiku neebe konsidera imajen la diak ba Munisipiu Baukau.
Enkuantu Xefe Suku Vemasi Carlos Freitas apresia ho sosializasaun refere, tanba bele fo hanoin ba lider komunitariu sira iha baze atu orienta komunidade sira labele kontra dezisaun husi dekretu lei nee rasik.
Maibe molok atu implementa dekretu lei refere hodi orienta komunidade sira lao tuir, parte relevante mos presiza kria kondisaun, tanba antes nee komunidade sira harii ona nia hela fatin besik mota ninin no estrada ninin mak foin Governu estabelese dekretu lei refere.
(EST 2)
