DILI, STLTIMORLESTE.com – Sekretariu Estadu Komunikasaun Sosial (SEKOMS) hamutuk ho Konsellu Imprensa (KI) selebra Loron Mundial Imprensa neebe monu iha loron 3 fulan Maiu nee, ho marsa husi Rotunda Francisco Xavier do Amaral too Largo Lecidere.
Marsa nee hahu tuku 07:00 OTL dader neebe partisipa husi Vise Primeiru Ministru, Ministru Koordenador Asuntu Ekonomiku (MKAE) no Ministru Turizmu no Ambiente (MTA), Sekretariu Estadu Komunikasaun Sosial (SEKOMS), Konsellu Imprensa (KI), organizasaun media, nomos funsionariu sira.
Vise Primeiru Ministru, Ministru Koordenador Asuntu Ekonomiku (MKAE) no Ministru Turizmu no Ambiente (MTA) Francisco Kalbuady Lay hateten, liberdade imprensa papel importante tebes, governu valoriza partisipasaun sira neebe mak hahu kedas iha luta ukun rasik aan.
“Ohin hanesan Loron Liberdade Imprensa iha Timor leste, ita hotu hatene katak ita boot sira nia papel importante teb-tebes, ita boot sira nia kontribuisaun boot teb-tebes hotu, imi nia servisu ami valoriza durante ita luta hahu husi 1999 mai too ohin loron, ita boot sira mos kontribui barak teb-tebes, liu-liu ba iha informasaun,” dehan Francisco Kalbuady Lay iha Rotunda Francisco Xavier do Amaral, Dili, bainhira halo abertura Marsa Loron Liberdade Imprensa, Sabadu (03/05/2025).
Vise Primeiru Ministru nee hateten, nia mai reprezenta IX Governu hodi kolia katak servisu nafatin ba liberdade, buat hotu lao ho demokrasia, husu ba jornalista hotu atu iha responsabilidade, ho ida nee Governu apresia no parabeniza ba loron boot ohin nian.
Iha sorin seluk, Sekretariu Estadu Komunikasaun Sosial (SEKOMS) Expedito Loro Dias Ximenes hateten, IX Governu fo atensaun jornalista nia liberdade no mos fo liberdade ba komunidade sira atu hatoo sira nia espresaun, IX Governu fo mos atensaun masimu neebe bazeia tuir Konstituisional Artigu 40 no 41.
“IX Governu Konstituisional fo tebes atensaun mai iha ita nia liberdade no mos fo liberdade ba komunidade sira atu hatoo sira nia Espresaun, IX Governu fo mos atensaun masimu, iha fatin balun ba iha liberdade imprensa espresaun bazea tuir Konstituisaun Artigo 40 no 41,” hatete nia iha Largo Lecidere.
Iha fatin hanesan, Prezidente Konsellu Imprensa (KI) Otelio Ote hateten, selebrasaun nee atu bolu entidade hotu no politika sira hotu hodi hametin liu tan liberdade imprensa iha Timor leste too Internasional.
“Loron ohin bolu atensaun ba publiku ba Loron Mundial Liberdade Imprensa neebe mak sai preokupasaun iha mundu, loron ohin mos mobiliza atividade politika sira, atentadu sira ba liberdade imprensa neebe mak sai kestaun global, ohin ita selebra hamutuk esforsu saida neebe selebra tiha ona, hodi hametin liberdade imprensa iha internasional no iha ita nia nasaun Timor Leste,” hateten Otelio Ote ba jornalista sira iha Largo Lecidere.
Nia dehan, iha okaziaun ida nee mos atu bolu atensaun ba Governu sira atu respeita liberdade imprensa, nunee mos ohin atu halo reflesaun ba profisional media ba liberdade imprensa ho etika profisional.
Aleinde nee, Prezidente Konsellu Imprensa nee mos konvidade ba entidade hotu, liu-liu ba orgaun media sira atu fo omenajem ba jornalista sira neebe mak mate ona, liu-liu jornalidta sira husi rai liur no rai laran neebe mak tinan barak halao sira nia ezersisiu, hodi kontribui ba liberdade imprensa iha Timor Leste.
Enkuantu Loron Mundial Liberdade Imprensa proklama husi Organizasaun Nasaun Unidas (ONU) iha tinan 1993, nunee iha Timor leste ohin selebra ho Tema “Impaktu Artifisial Intelijensia Ba Liberdade Imprensa”.
(EST 02)
