DILI, STLTIMORLESTE.com – Sekretariu Estadu Ensinu Sekundariu Jeral no Ensinu Tekniku Vokasional (SEESJ-ESTV), Domingos Lopes Lemos halao abertura ba workshop nasional ba utilizasaun dijitalizasaun ba eskola tekniku vokasional.
“Hau hakarak halo lo-loos katak, ohin ita laos lansa, maibe ita halo workshop ida ba utilizasaun dijitalizasaun eskola sira liu-liu eskola tekvo, tanba ida nee mak ohin diresaun nasional tekvo realiza hela eventu nee, atu nunee diretor eskola sira hotu, Diretor Edukasaun Munisipal sira partisipa hotu, nunee sira rona direitamente palestra husi peritus sira kona-ba dijitalizasaun iha eskola. Primeiru ita dijitalizasaun maibe ita haree liu ba website iha eskola sira, tanba dala barak publiku nian ezijensia katak, eskola tekvo barak mak eziste hela, maibe sira la hatene prosesu andamentu eskola tekvo iha ita nian rai,” dehan SEESJ-ESTV, Domingos ba jornalista sira iha salaun Ian Martin, Balide, Kuarta nee (19/03/2025).
Nia hatutan, politika neebe mak sira iha katak, primeiru kria lai website iha eskola sira, atu nunee eskola hotu neebe mak iha bele halo promosaun ba sira nian eskola rasik, agora daudaun planu ba 2025 nee eskola tekvo balu mak atu halo investimentu ba komputador sira no ekipamentus sira seluk neebe mak eskola sira presiza.
“Ita seidauk hatene atu sosa komputador hira, maibe nee ita sei distribui ba eskola tekvo nomos ensinu sekundariu jeral. Ita tenke halo estudu viabilidade ida atu nunee haree kursu sira neebe mak anteriormente nee loke ona iha eskola sira baze nee, tanba kursu balu la relasiona ho munisipiu neebe mak eskola nee loke,” katak nia.
Nunee mos Diretor Ezekutivu TIC Timor, Venancio Pinto dehan, koalia dijitalizasaun, maibe haluha tiha infraestrutura, ida nee mos labele halo buat ida, ida nee parte husi aprezentasaun hotu, tanba labele koalia parte ida, halo tiha dezafiu seluk, ida nee sai materia ida neebe konfrensivu, nee katak koalia aplikasaun, infraestrutura, sentru dadus, koalia mos kona-ba seguransa.
“Atu mai informa partilha informasaun TIC nian papel nee saida, ita mai laos atu fo materia dijitalizasaun nee oinsa, mai para partilha lai informasaun kona-ba TIC nee rasik ninia papel, mezmu tempu TIC ho edukasaun komesa servisu ona iha area barak, neebe agora dezenvolve hela iha diskusaun atu lori prosesu sira nee ba oin kona-ba dijitalizasaun, maibe ita haree mos ba infraestrutura,” nia dehan.
(jac)
