DILI, STLTIMORLESTE.com – Sekretariu Estadu Formasaun Profisional no Empregu (SEFOPE) kontinua despede trabalhador Timoroan nain 46 ba servisu iha Australia.
“Ita rekruta trabalhador Timoroan nain 46 neebe kompostu husi mane 33 no feto 13, hodi asina deklarasaun entre Governu, familia no trabalhador molok aranka ba servisu iha Australia,” dehan Diretor Diresaun Nasional Empregu Estranjeiru (DNEE), João Correia Pereira liu husi nia diskursu iha ETDA, hafoin halo serimonia despedida ba trabalhador Timoroan sira atu ba servisu iha Australia, Kuarta (23/10/2024).
Tuir Diretor nee, oportunidade ba trabalhador Timoroan atu ba servisu iha Australia tenki hatudu disiplina servisu nafatin, no hatudu maturidade servisu, hodi oinsa bele ganha esperiensia servisu, no kontinua adapta ema nia kultura, bainhira fila bele mai kontribui fali ba Estadu TL.
Tanba nee ohin fo oportunidade ba trabalhador Timoroan nain 46 ba servisu iha kompanhia ka empregador 4 mak hanesan Hillwood Berries, Murrakei Farm, Down to Eart no FS People Pty.
Nia dehan, kumpri regras no lei nasaun Australia no atu labele ses husi sistema ho razaun, tanba absconding sae makaas, nunee husu ba trabalhador sira tenke banati tuir trabalhador retornu sira, no husu trabalhador tenke respeita malu, hodi servisu ho diak iha ema nia nasaun.
Entretantu Diretor Jeral, Carlito enkoraja foinsae nain Timoroan sira neebe hetan tan oportunidade atu ba servisu iha Australia, hatudu komportamentu neebe diak, nunee bele hamorin nafatin estadu nian naran iha ema nia nasaun.
Tanba servisu iha Australia atu manan osan no hetan esperiensia foun husi ema nia rain, nunee fila mai bele diversifika ekonomia familia no hasae kresimentu ekonomia nasaun TL nian, liu husi loke empreza kiik sira.
Iha sorin seluk, Trabalhador Timoroan, Junio Reverino das Dores hatete, agradese ba oportunidade neebe iha, hanesan trabalhador sei nafatin kumpri ba regulamentu sira neebe estadu rua nee komprova ona, katak labele halo problema iha ema nia nasaun, servisu ho disiplina, hanoin ba futuru aban bainrua nian.
Tanba Timoroan barak mak ba servisu ona iha ema nia nasaun liu-liu Australia, Korea, Japaun, Inglatera, barak mak hakarak sai husi sistema no lakohi atu moris tuir regra neebe iha, tanba nee enkoraja ba ita trabalhador hotu atu kumpre ordenamentu sira neebe iha, hodi fasil ba ita atu Governu bele organiza bainhira hetan problema iha ema nia nasaun.
(EST 2)
