BAUKAU, STLTIMORLESTE.com – Sekretariu Estadu Formasaun Profisional no Empregu (SEFOPE) entrega eis trabalhador Timoroan neebe servisu iha Australia ba familia sira iha Munisipiu Baukau.
Sekretariu Estadu Formasaun Profisional no Empregu, Rogério Araújo Mendonça esplika, iha tinan 2012 Governu Timor Leste selebra Memorandum of Understanding (MoU) ho Governu Australia ba programa laboral no semi skil hodi rekruta Timoroan ba servisu iha Australia too ohin loron hamutuk rihun 18 ho rotativamente.
Nia sublina, liu husi rekrutmentu trabalhador Timoroan ba servisu iha rai liur inklui Australia, hetan kritiku makaas husi publiku inklui iha Parlamentu Nasional, tanba sujere atu Governu kria kampu trabalhu iha rai laran, maibe liu husi rekrutmentu ba Timoroan neebe hetan oportunidade ba servisu iha rai liur bele kria kampu trabalhu iha rai laran hodi emprega Timoroan.
“Ho ida nee, ita boot sira neebe hau haree 200 ital neebe fila mai nee importante, ita boot sira bele sai ema neebe emprega ba sira seluk,” hateten Rogério liu husi nia diskursu iha serimonia entrega eis trabalhador Timoroan ba familia sira iha Baukau, Kuarta (09/04/2025).
Sekretariu Estadu nee argumenta, trabalhador Timoroan neebe durante servisu iha estranjeiru liu-liu iha Nasaun Australia iha kapasidade finanseiru no abilidade, nunee investe hodi hadia kresimentu ekonomia no fo oportunidade ba Timoroan hodi servisu.
Nia informa, trabalhador Timoroan balun fila husi Australia daudaun investe ona, hahu husi eskalaun mini market no iha area transporte terrestre.
“Ida nee tulun ona Governu kria kampu trabalhu fo servisu ba ema seluk, involuntariamente imi nia hasae kresimentu aas, nee hatudu katak prestasaun servisu diak tebes,” Rogério akresenta.
Eis trabalhador Australia, João Baptista Freitas hateten, servisu iha Australia durante tinan 2 iha area hortikultura, daudaun iha ona kapasidade finanseiru no konsege investe setor hortikultura kuda fehuk no hudi iha Postu Administrativu Vemasi hodi fo kampu trabalhu ba Vemasi oan nain 10. Aleinde mos loke rental inklui faan saldo prepagu neebe daudaun emprega mos trabalhador hodi hein.
“Nuudar trabalhador hau orgulhu tebes, tanba SEFOPE nee oportunidade diak, ita ba intensaun hadia moris aprende buat lubuk ida, primeiru hetan osan oituan, segundu bele aprofunda abilidade,” hateten João Baptista.
Eis trabalhandor nee orgulhu ho kooperasaun Timor Leste no Australia liu husi emprezariu sira iha Australia rekruta Timoroan hodi servisu nee diak, tanba bele hetan finanseiru hodi hadia kresimentu ekonomia familia.
Tanba nee husu SEFOPE atu nafatin halo kooperasaun ho nasaun seluk hodi rekruta Timoroan ba servisu hadia moris hanesan maluk Timoroan neebe hetan oportunidade servisu iha rai liur hetan finanseiru.
(tom)
