DILI, STLTIMORLESTE.com – Sekretariu Estadu Formasaun Profisional no Empregu (SEFOPE) husu ba trabalhador Timoroan hotu, liu-liu relasaun feen ho laen tenke harii amizade domin ba malu, antes ba servisu iha Australia.
“Ita sempre halo rekrutamentu ba trabalhador Timoroan sira atu ba servisu iha Australia, ita sempre fo hanoin, ba servisu tenke ho disiplina, respita malu, kria dame malu hanesan Timoroan hotu, tanba nee trabalhador Timoroan sira servisu iha Australia, hanesan feen servisu iha Australia, laen iha Timor Leste, tenke harii nafatin relasaun domin no amizade ba malu, hodi familia bele lao armonia no felisidade nafatin,” dehan Diretor Diresaun Nasional Empregu Estranjeiru, João Correia Pereira, liu husi nia diskursu hafoin trabalhador nain 41 asina deklrasaun atu ba servisuiha Australia, iha Salaun ETDA Fatuhada, Dili, Kuarta (22/01/2025).
Diretor nee hatutan, Trabalhador Timoroan tenke servisu diak iha ema nia rain, no ema neebe iha parseiru ka parseira nuudar fen no laen tenke iha regulamentu katak fiar malu, harii dame no domin ba malu nafatin, atu familia bele buras ba nafatin.
Tanba nee, trabalhador Timoroan hotu tenke hatene, katak feen ho laen nuudar familia importante, nunee husu atu harii dame, komunika malu nafatin, husu kondisaun ba malu, atu relasaun familia hanesan feen ho laen labele lakon konfiansa.
Iha fatin hanesan, Xefe Departamentu Deslokasaun, Alarico Fernandes dehan, feen ho laen nee familia neebe ema hotu rekonhese, katak iha ona dalan ida harii uma kain, tanba nee asuntu sira neebe importante hanesan feen ho laen iha regulamentu (absconding), no sasan neebe ema bandu iha alfandega Darwin, Australia.
Entretantu Kordenador LSU, Eliterio Borges dos Lemos enkoraza nafatin ba trabalhador Timoroan neebe ba servisu iha Australia, iha feen ka lae tenke mantein amizade no fo konfiansa ba malu no halo komunikasaun diak, atu domin hanesan feen ho laen bele buras nafatin.
Tanba nee, hanesan inan aman trabalhador Timoroan hotu tenke komprende oan sira nia situasaun iha ema nia rain, no trabalhador tenke kolabora ho governu, nunee labele sai husi sistema, tanba la iha Governu ida atu prejudika joven sira ho situasaun neebe aat.
Governu bele troka, maibe programa ida nee nunka troka, tanba Governu iha responsabilidade atu hamenus dezempregu iha nasaun Timor Leste.
(EST 1)
