DILI, STLTIMORLESTE.com – Sekretariu Estadu ba Igualdade (SEI) hamutuk ho parseru save sira abertura kampanha loron 16 ativizmu kontra feto no labarik feto iha Timor Leste.
SEI hamutuk ho parseiru save sira hanesan UN WOMEN, TAF NABILAN, UNFPA, VPU-PNTL, iha Tersa (25/11/2025), iha Suku Hera, Postu Administrativu Cristo-Rei no Munisipiu Dili, abertura ba kampanha loron 16 husi Loron 25 de Novembru de 2025 too loron 10 Dezembru de 2025, nuudar loron ativismu kontra violensia hasoru feto no labarik feto iha TL.
Tema kampana loron 16 ativismu kontra violensia hasoru feto no labarik-feto iha 2025 “Hamutuk Hasae Konsiensia Literasia Dijital no Online seguru ba Feto no Labarik-Feto iha Diversidade hotu” no nuudar tema importante bazeia ba situasaun realidade neebe mak ohin loron feto no labarik-feto sira hasoru iha sosiedade nia leet.
Tuir SEI Elvina Sousa Carvalho hatete, violensia bazeia ba jeneru laos deit akontese iha uma ka dalan. Bele akontese mos iha whatsApp, facebook no rede sosial sira seluk.
“Violensia dijital neebe bazeia ba jeneru (VDBJ) akontese bainhira ema uza teknolojia atu ameasa, tolok, kontrolu, ka halo asediu seksual ba ema seluk tanba vítima nia jeneru,” dehan nia.
Jornalista: Emerenciana Pinto
Editora: Domingas Gomes
