DILI, STLTIMORLESTE.com – Sekretariu Estadu Igualidade (SEI), Elvina Sousa Carvalho hatene, SEI servisu hamutuk ho linhas ministeriais sira no servisu prinsipal mak halo advokasia, nunee durante nee linhas ministeriais sira kumpri no halo sira nia reponsabilidade nee ho diak.
Liafuan nee hatoo husi Sekretariu Estadu Igualidade (SEI), Elvina Sousa Carvalho ba jornalista sira iha Otel Novo Turizmu Lecidere, Tersa (30/09/2025).
“Husi ami nia observasaun no avaliasaun neebe mak iha kona-ba implementasaun no deklarasaun iha Maubisi, durante nee linhas ministeriais sira kumpri no halo sira nia reponsabilidade neebe mak ho diak, mezmu iha implementasaun dala ruma iha satan balun, maibe kuaze linhas ministerias balun iha komitmentu atu implementa deklarasaun ba iha Maubisi,” katak Elvina.
Nunee, SEFOPE ho MSSI no linhas ministerial sira seluk nafatin halo papel advokasia koordena ho servisu, ho linhas ministeriais sira seluk, durante nee iha kooperasaun neebe mak diak tebes, parte husi linhas ministerial no implementador sira advokasia ho diak.
“Ita boot sira hatene katak, iha deklarasaun Maubisi katak, linhas ministeriais sira iha komitmentu tebes atu rona komitmentu husi IX Governu konstituisuonal ba iha asuntu ida nee,” katak nia.
Nunee, atu hatete katak, iha hela prosesu atu aprezenta lei ba trabalhador domestika ida neebe mak durante nee sai hanesan advokasia ba iha sosiedade sivil no mos sai hanesan rekomendasaun husi grupu Parlamentu Nasional no Komisaun F.
“Servisu ida nee agora lao hela entre SEI no SEFOPE, no apoiu husi parseiru internasional sira, hau hein katak iha tempu badak bele aprezenta ba iha Konselhu Ministru,” nia hakotu.
Jornalista: EST 1
Editor: Xisto Mendonça
