DILI, STLTIMORLESTE.com – Sekretariu Estadu Igualdade (SEI) halao advokasia no programa ba partisipasaun feto iha vida politika, oinsa halo prevensaun no kombate violensia bazeia ba Jeneru hodi hakbiit ekonomia iha nivel foti desizaun.
“Ita hamutuk ho parseiru sira tantu nasional no internasional halo ona esforsu oin-oin atu atinje objetivu hodi hasae partisipasaun feto iha vida politika, lei, ekonomia no nivel foti desizaun nian, no labele hetan violensia bajeia ba jeneru iha sosiedade,” dehan Sekretariu Estadu Igualdade (SEI), Elvina Sousa de Carvalho ba jornalista sira iha Timor Plaza Suai Room, Dili, Tersa (17/12/2024).
Nia dehan, programa neebe ohin SEI halo hamutuk ho Grupu Trabalhu Bazeia ba Jeneru bazeia ba rezolusaun nu. 35/2017 estabelese ba Grupu Trabalhu Jeneru nian, no importante atu promove jeneru inkluzaun ba programa orsamentu iha planu asaun ida katak, oinsa hakbiit bazeia ba jeneru feto iha vida politika no nivel foti desizaun nian.
Tanba programa ohin oinsa atu buka hatene kona-ba dezafius sira neebe iha linha ministriais no autoridade lokal sira halo hodi hasoru ba kestaun bazeia ba jeneru, oinsa bele masimiza liu tan partisipasaun feto iha vida politika no foti desizaun.
Iha fatin hanesan, autoridade lokal no nuudar partisipante ba programa SEI, Geronimo de Jesus hatete, feto nia direitu nee importante liu, tanba nee presiza hakbiit liu tan feto nia direitu sira, no presiza harii Grupu Trabalhu feto iha sosiedade ho rigor, nunee masimiza partisipasaun feto iha vida politika lei no ekonomia.
Tanba durante nee feto sempre hasoru difikuldade hanesan violensia oin-oin neebe mak sira hasoru iha sosiedade bazeia ba jeneru, nunee presiza fortifika liu tan ba rezolusaun neebe mak aprova ona husi governu atu bele fo liberdade ba feto hodi foti desizaun bazeia ba jeneru no inkluzaun sosial.
Entretantu Diretora Nasional Relasaun Publiku, Maria Filomena Babo Martins dehan, programa ohin nee halo advokasia ba iha abordajen integrada jeneru iha politika, lei, programa no orsamentu, hodi halo prevensaun no kombate violensia bazeia ba jeneru no hakbiit ekonomia feto no hasae partisipasaun feto iha vida politika no nivel foti desizaun.
(EST 1)
