BAUKAU, STLTIMORLESTE.com – Sekretaria Estadu ba Igualdade (SEI) hamutuk ho Asosiasaun Feto Hadomi Baukau ba Dezenvolvimentu (AFEHABAD) realiza konferensia Munisipal da-tolu, iha Munisipiu Baukau.
Deklarasaun nee hatoo husi Sekretaria Estadu Igualidade, Elvina Sousa Carvalho ba jornalista sira, hafoin abertura konferensia Asosiasaun Feto Munisipal ba da-tolu, iha salaun sentru konvensaun Vila Antiga, Baukau, Tersa nee (05/11/2024)
“Ohin Sekretaria Estadu ba Igualdade hamutuk ho Asosiasaun Feto Munisipal halo Kongresu ba da-tolu atu Asosiasaun hili nia lideransa foun depois trasa planu ba mandatu nian,” nia dehan.
Governante nee konsidera, konferensia Munisipal refere mak eventu importante ba Asosiasaun Feto Munisipa neebe akumula husi feto potensial sira iha Munisipiu Baukau tomak hili lideransa foun ba mandatu tinan 5 nian neebe bele trasa planu asaun nasional hodi ajusta planu SEII nian neebe bele empodera feto iha prosesu dezenvolvimentu, tanba husi area politika feto mos iha kapasidade atu sai lideransa, maibe izola husi sistema kultura.
Nia sublina, papel Asosiasaun Feto Munisipal mos importante no kursial, tanba bele sai parseiru diak ho SEI neebe apoiu ona programa balun liu husi kapasitasaun ba feto maluk sira iha nivel Munisipiu atu partisipa iha prosesu dezenvolvimentu.
Nunee SEI nafatin konsisten no kontinua realiza advokasia bazeia ba deklarasaun Maubesi neebe konjunta forsa trabalhu husi linhas ministeriais sira hanesan, Ministeriu Administrasaun Estatal, Saude, Obras Publiku inklui Banku Nasional Komersial Timor Leste, neebe fo apoiu finanseiru ba feto vulneravel sira halo negosiu nian.
Atual Prezidente AFEHABAD, Regina de Sousa relata, total kongresista neebe partisipa iha eventu refere hamutuk 105 husi Postu Administrativu 6 neebe eziste iha Baukau.
“Orsida ita sei halo diskusaun kona-ba rejimentu, tuir ajenda loraik sei iha eleisaun, tanba nee mudansa ba estrutura,” hateten Rejina.
Entretantu total orsamentu neebe Governu liu husi SEI aloka ba serimonia refere hamutuk US$ 5.000.
(EST/2)
