DILI, STLTIMORLESTE.com – Sekretaria Estadu ba Igualdade (SEI) hamutuk ho Parseiru organiza konsultasaun nasional kona-ba ekonomia kuidadu iha Timor Leste.
Sekretariu Estadu Ba Igualdade, Elvina Sousa Carvalho hatete, ohin konsulta nasional valoriza no investe ba servisu kuidadu, nee laos serbisu mesak maibe serbisu ho linas ministerias nomos sosiedade sivil sira neebe durante nee halo advokasia ba iha serbisu kuidadu nomos ba trabalhador domestika.
“Ida nee laos serbisu mesak maibe nee serbisu entre SEI, Sefope, no servisu hamutuk ho UN Women Timor Leste ho suporta ESCAP apoiu teknikal nomos apoiu finanseiru ba iha intrudusaun nomos ba iha implementasaun politika hodi valoriza ekonomia kuidadu,” dehan nia ba jornalista iha Novu Turizmu, Tersa (30/09/2025).
Nia dehan, dala ruma ema hanoin termus ida foun, maibe atu hatete deit nee serbisu hotu liga ho kuidadu ezemplu tau matan ba ema ho defisiensia, tau matan ba ema idozu ka tau matan ba oan sira neebe beban makaas ba iha feto maluk sira mak halo atividade sira hanesan nee.
“Bainhira ita haree sistema patriarkal fo todan liu ba feto halo serbisu sira nee, entau sai mos hanesan bareira ba sira atu bele hakat ba oin, no sai mos bareira ba sira atu esplora sira nia potensia tomak hakat ba oin hodi partisipa iha dezenvolvimentu nasional,” katak nia.
Nia hatete, feto sei hasoru bareira oin oin hodi sai satan ba sira atu bele partisipa iha vida politika, ekonomia, tanba nee mak SEI hamutuk ho parseiru nafatin serbisu atu hakbiit no fo konhesementu, atu nunee iha uma laran bele fahe serbisu ba malu hanesan. Nunee labele fo todan liu ba oan feto no inan sira iha familia.
Jornalista: Emerenciana Pinto
Editora: Domingas Gomes
